Ahmedabad Waqf land - વકફ જમીન પર બનેલી દુકાનો અને મકાનોનું 17 વર્ષથી ભાડું વસૂલવા બદલ 5 ની ધરપકડ

અમદાવાદમાં પોલીસે વક્ફ બોર્ડ હેઠળ નોંધાયેલા બે ટ્રસ્ટની મિલકતો પર 17 વર્ષનું ભાડું વસૂલવા બદલ પાંચ લોકોની ધરપકડ કરી છે. ગાયકવાડ હવેલી પોલીસ સ્ટેશનમાં નોંધાયેલી એફઆઈઆર મુજબ આ મામલો પ્રકાશમાં આવ્યો છે. આરોપીઓ સામેની ન્યાયિક કાર્યવાહી દરમિયાન, એવું બહાર આવ્યું કે તેઓએ કાંચણી મસ્જિદ ટ્રસ્ટ અને શાહ બડા કાસમ ટ્રસ્ટની જમીન પર લગભગ 100 ઘરો અને દુકાનો બનાવી હતી અને તેમના માટે ભાડું વસૂલ્યું હતું.

ડેપ્યુટી કમિશનર ઓફ પોલીસ (ડીસીપી) ભરત રાઠોડના જણાવ્યા અનુસાર, આરોપીઓએ વક્ફ બોર્ડ હેઠળ નોંધાયેલા ટ્રસ્ટની મિલકતોનો વ્યક્તિગત લાભ માટે દુરુપયોગ કર્યો હતો. "આરોપીઓએ 2008 થી 2025 દરમિયાન 5,000 ચોરસ મીટરથી વધુ વિસ્તારમાં ગેરકાયદેસર બાંધકામ કર્યું હતું અને લગભગ 100 મિલકતો (મુખ્યત્વે મકાનો અને દુકાનો) બનાવી હતી. દર મહિને તેઓ આ મિલકતોમાંથી ભાડું વસૂલતા હતા," તેમણે કહ્યું.

પકડાયેલા આરોપીઓની ઓળખ 

ધરપકડ કરાયેલા વ્યક્તિઓની ઓળખ સલીમ ખાન પઠાણ, મોહમ્મદ યાસર શેખ, મહમૂદ ખાન પઠાણ, ફૈઝ મોહમ્મદ ચોબદાર અને શાહિદ અહેમદ શેખ તરીકે થઈ છે. આમાંથી, સલીમ ખાન પઠાણ એક જૂનો ગુનેગાર છે, જેની સામે અગાઉ આર્મ્સ એક્ટ અને અન્ય કેસ હેઠળ આરોપો લગાવવામાં આવ્યા છે.

ટ્રસ્ટનાં સભ્યો નથી આરોપી 

સંબંધિત ટ્રસ્ટની મિલકતો પર બનેલા મકાનો અને દુકાનોના ભાડૂઆતોમાંના એક મોહમ્મદ રફીક અંસારીએ ફરિયાદ નોંધાવી છે. તેમણે કહ્યું કે આરોપીઓમાંથી કોઈ પણ આ ટ્રસ્ટના સભ્ય નથી અને તેમણે ભાડાના પૈસા પોતાના અંગત ફાયદા માટે વાપર્યા હતા. આ ઉપરાંત, આરોપીઓએ શાહ બડા કાશી ટ્રસ્ટના દાનપેટીમાં જમા કરાયેલા પૈસાની માલિકીનો પણ દાવો કર્યો હતો.

આરોપી દ્વારા બાંધવામાં આવેલી એક દુકાનનો ઉપયોગ સલીમ ખાન પોતાની ઓફિસ માટે કરતો હતો, જ્યારે બાકીની દુકાનો ભાડે આપવામાં આવી હતી. અન્સારીએ જણાવ્યું હતું કે આરોપીઓ દ્વારા વસૂલવામાં આવેલ ભાડું ટ્રસ્ટના ખાતામાં જમા કરવામાં આવ્યું ન હતું કે તે અમદાવાદ મ્યુનિસિપલ કોર્પોરેશન (AMC) ને સોંપવામાં આવ્યું ન હતું, જે સ્પષ્ટ કરે છે કે તેઓએ AMC અને વક્ફ બોર્ડ સાથે છેતરપિંડી કરી છે.