ગેસ અછતની અફવાઓનું CM દ્વારા ખંડન: ગભરાટ ન ફેલાવવા અપીલ, પુરવઠા વ્યવસ્થા માટે મુખ્યમંત્રી નિવાસસ્થાને મહત્વની બેઠક

રાજ્યમાં LPG ગેસની અછતની અફવાઓનું ખંડન ગુજરાતમાં LPG ગેસની અછત અંગે ચાલી રહેલી અફવાઓ વચ્ચે મુખ્યમંત્રી ભૂપેન્દ્ર પટેલે સ્પષ્ટતા કરી છે કે રાજ્ય પાસે ગેસનો પૂરતો પુરવઠો ઉપલબ્ધ છે. કેટલીક જગ્યાએ ગેસની અછતને લઈને ખોટી વાતો ફેલાઈ રહી છે, જેનાથી નાગરિકોમાં ગભરાટ અને દોડાદોડીનો માહોલ ઊભો થયો છે. મુખ્યમંત્રીએ લોકોને અપીલ કરી છે કે કોઈપણ ગેરસમજમાં ન આવે, એકબીજાની વાતો સાંભળીને પેનિક ન ફેલાવે અને માત્ર સત્તાવાર માહિતી પર જ વિશ્વાસ રાખે. 

રાજ્યમાં હાલ પરિસ્થિતિ સંપૂર્ણપણે સામાન્ય અને શાંતિપૂર્ણ  

ઘરેબેઠા ગેસ સિલિન્ડર મળવાની ખાતરી નાગરિકોને આશ્વાસન આપતા મુખ્યમંત્રીએ જણાવ્યંપ છે કે ગેસના સપ્લાયમાં કોઈપણ પ્રકારની મુશ્કેલી ઊભી નહીં થાય. રાજ્યમાં ગેસનો પૂરતો જથ્થો હોવાથી લોકોને નિયમિત રીતે ઘરેબેઠા ગેસ સિલિન્ડર સરળતાથી મળી રહેશે. લોકોએ અછતની ભીતિ રાખીને સંગ્રહખોરી કે દોડાદોડી કરવાની કોઈ જ જરૂર નથી. સરકાર અને સંબંધિત વિભાગો પુરવઠા વ્યવસ્થા પર સતત ચાંપતી નજર રાખી રહ્યા છે.

મુખ્યમંત્રીના નિવાસસ્થાને મહત્વપૂર્ણ બેઠકનું આયોજન 

ગેસ પુરવઠાની સ્થિતિને લઈને કોઈ કચાશ ન રહે અને વિતરણ વ્યવસ્થા સુદ્રઢ રહે તે હેતુથી મુખ્યમંત્રી ભુપેન્દ્ર પટેલે આજે એક મહત્વપૂર્ણ બેઠક પણ બોલાવી છે. આ બેઠક મુખ્યમંત્રીના નિવાસસ્થાને થોડી જ વારમાં યોજાવા જઈ રહી છે. જેમાં અફવાઓના ખંડન સાથે-સાથે રાજ્યમાં ગેસના વાસ્તવિક પુરવઠા અને વિતરણ સંબંધિત તમામ પાસાઓ પર સઘન અને વિસ્તૃત ચર્ચા કરવામાં આવશે.

બેઠકમાં મંત્રીઓ અને ઉચ્ચ અધિકારીઓની ઉપસ્થિતિ 

ગેસની સ્થિતિ અંગે સમીક્ષા કરવા માટેની આ ઉચ્ચ સ્તરીય બેઠકમાં રાજ્યના પુરવઠા મંત્રી રમણ સોલંકી અને મુખ્ય સચિવ એમ.કે. દાસ ખાસ ઉપસ્થિત રહેશે. આ ઉપરાંત, રાજ્ય સરકારના અન્ય વરિષ્ઠ અધિકારીઓ તેમજ અન્ન અને નાગરિક પુરવઠા વિભાગના ઉચ્ચ અધિકારીઓ પણ આ બેઠકમાં જોડાશે. આ તમામ નિષ્ણાતો અને અધિકારીઓ સાથે મળીને ગ્રાહકો સુધી ગેસ પહોંચાડવાની વ્યવસ્થાની સમીક્ષા કરશે.

વિતરણ વ્યવસ્થાની સમીક્ષા અને ભવિષ્યના પગલાં પર મંથન 

આ બેઠકમાં ખાસ કરીને ગેસના પુરવઠાની હાલની સ્થિતિ, વિતરણની ચેઈન અને લોકો સુધી સમયસર ગેસ પહોંચે તે સુનિશ્ચિત કરવા લેવામાં આવનારા જરૂરી પગલાં અંગે ચર્ચા કરવામાં આવશે. ગેસના પુરવઠામાં ભવિષ્યમાં પણ કોઈ મુશ્કેલી ન સર્જાય તે માટેના સંભવિત ઉપાયો પર સરકાર વિચારણા કરશે. બેઠક બાદ રાજ્યમાં ગેસ પુરવઠાના સુચારુ સંચાલન અંગે કોઈ મહત્વપૂર્ણ નિર્ણયની જાહેરાત કરવામાં આવે તેવી પણ પ્રબળ શક્યતા છે.