Publish Date: Sat, 11 Jul 2026 (09:59 IST)
Updated Date: Sat, 11 Jul 2026 (10:03 IST)
રાજ્યની ઉચ્ચતર માધ્યમિક શાળાઓમાં શિક્ષક બનવાની તૈયારી કરી રહેલા ઉમેદવારો માટે મહત્વના સમાચાર સામે આવ્યા છે. રાજ્ય પરીક્ષા બોર્ડ દ્વારા TAT-HS (Teacher Aptitude Test – Higher Secondary) ની મુખ્ય પરીક્ષાની તારીખ સત્તાવાર રીતે જાહેર કરી દેવામાં આવી છે. જાહેર કરાયેલા સત્તાવાર કાર્યક્રમ મુજબ, આ પરીક્ષા આગામી 2 ઓગસ્ટના રોજ લેવામાં આવશે.
આ પરીક્ષા ધોરણ 11 અને 12માં શિક્ષક તરીકે નિમણૂક મેળવવા ઇચ્છુક ઉમેદવારો માટે ફરજિયાત છે. લાંબા સમયથી રાહ જોઈ રહેલા હજારો ઉમેદવારોમાં પરીક્ષાની તારીખ જાહેર થતાં જ ભારે ઉત્સાહ જોવા મળી રહ્યો છે. હવે પરીક્ષાની ચોક્કસ તારીખ સામે આવી જતાં ઉમેદવારો વધુ સઘન અને ચોક્કસ આયોજન સાથે પોતાના અભ્યાસની તૈયારીઓ કરી શકશે.
રાજ્ય પરીક્ષા બોર્ડ દ્વારા ટૂંક સમયમાં જ પરીક્ષાને લગતી અન્ય તમામ મહત્વપૂર્ણ વિગતો, જેવી કે હોલ ટિકિટ (એડમિટ કાર્ડ), પરીક્ષા કેન્દ્રો અને પરીક્ષા લક્ષી જરૂરી સૂચનાઓ પણ સત્તાવાર વેબસાઇટ પર જાહેર કરવામાં આવશે. આથી તમામ ઉમેદવારોને પરીક્ષા બોર્ડની સત્તાવાર જાહેરાતો અને અપડેટ્સ પર સતત નજર રાખવાની સલાહ આપવામાં આવી છે.
