Publish Date: Sun, 02 Aug 2026 (09:27 IST)
Updated Date: Sun, 02 Aug 2026 (10:59 IST)
જિલ્લામાં દારૂની હેરાફેરી સામે મહેસાણા પોલીસે વધુ એક મોટી સફળતા મેળવી છે. નંદાસણ પોલીસ સ્ટેશનની ટીમે હાઈવે પર વાહન ચેકિંગ દરમિયાન એક શંકાસ્પદ ક્રેટા કારમાંથી 16 લાખથી વધુનો વિદેશી દારૂ જપ્ત કરીને રાજસ્થાનના બે શખ્સોની ધરપકડ કરી છે.
પોલીસને પેટ્રોલિંગ દરમિયાન હાઈવે પર એક શંકાસ્પદ ક્રેટા કાર જોવા મળી હતી. ગાડીને રોકીને તપાસ કરતા તેમાંથી મોટી માત્રામાં વિદેશી દારૂનો જથ્થો મળી આવ્યો હતો. પ્રાથમિક તપાસમાં સામે આવ્યું કે આરોપીઓએ વાહન પર ખોટી નંબર પ્લેટ લગાવી હતી અને રાજસ્થાનથી ગુજરાતમાં ગેરકાયદેસર રીતે વિદેશી દારૂની હેરાફેરી કરી રહ્યા હતા.
16 લાખથી વધુનો મુદ્દામાલ જપ્ત
પોલીસે દરોડા દરમિયાન વિદેશી દારૂ, ક્રેટા કાર અને અન્ય સામાન સહિત કુલ 16 લાખથી વધુનો મુદ્દામાલ જપ્ત કર્યો છે. સમગ્ર મામલે નંદાસણ પોલીસ સ્ટેશનમાં ગુનો નોંધવામાં આવ્યો છે અને કુલ ત્રણ આરોપીઓ સામે કાયદેસરની કાર્યવાહી હાથ ધરવામાં આવી છે.
નેટવર્ક સુધી પહોંચવા તપાસ શરૂ
પકડાયેલા બંને આરોપીઓની સઘન પૂછપરછ ચાલી રહી છે. આ દારૂનો જથ્થો કોને પહોંચાડવાનો હતો, તેની પાછળ કોણ સંકળાયેલું છે અને સમગ્ર હેરાફેરીના નેટવર્કમાં અન્ય કોણ-કોણ સામેલ છે તે દિશામાં પોલીસ વધુ તપાસ કરી રહી છે.
મહેસાણા પોલીસની આ કાર્યવાહીના પગલે જિલ્લામાં સક્રિય બુટલેગરોમાં ફફડાટ ફેલાયો છે. પોલીસનું કહેવું છે કે ગેરકાયદે દારૂના કારોબાર સામે આવી જ કડક કાર્યવાહી આગળ પણ ચાલુ રહેશે.
