GSRTC ની હાઈટેક બસ સેવામાં હવે QR કોડથી ટિકિટ પેમેન્ટ કરવાની સુવિધા શરૂ થઈ ગઈ છે. ગુજરાત રાજ્ય માર્ગ વાહન વ્યવહાર નિગમ (GSRTC) હવે ડિજિટલ યુગ સાથે કદમ મિલાવી રહ્યું છે. વર્ષો જૂની છૂટા પૈસાની સમસ્યાને દૂર કરવા માટે નિગમે આધુનિક ટેક્નોલોજી અપનાવી છે, જેના કારણે મુસાફરોને વધુ સરળ અને ઝડપી સેવા મળી રહી છે.
વર્ષ 2025-26 દરમિયાન GSRTC એ ડિજિટલ ટ્રાન્ઝેક્શન દ્વારા 722 કરોડ રૂપિયાની આવક મેળવીને નવો રેકોર્ડ બનાવ્યો છે. નિગમની કુલ આવકમાં હવે લગભગ 30 ટકા હિસ્સો ડિજિટલ પેમેન્ટનો છે. આ આંકડા દર્શાવે છે કે મુસાફરો હવે રોકડ કરતાં ઓનલાઈન પેમેન્ટને વધુ પ્રાથમિકતા આપી રહ્યા છે.
હવે બસમાં મુસાફરી દરમિયાન કંડક્ટરના ઈલેક્ટ્રોનિક ટિકિટ મશીન (ETM) પર QR કોડ સ્કેન કરીને ટિકિટના નાણાં તરત ચૂકવી શકાય છે. આ નવી સુવિધાથી મુસાફરોને છૂટા પૈસાની ઝંઝટમાંથી રાહત મળશે, જ્યારે કંડક્ટર માટે પણ કામગીરી વધુ સરળ અને ઝડપી બનશે. ડિજિટલ પેમેન્ટની આ પહેલથી GSRTC ની સેવા વધુ પારદર્શક, આધુનિક અને મુસાફરમૈત્રી બની રહી છે.