ઉત્તરાયણ પહેલાં બજારોમાં રોનક: ભાવમાં 30 ટકાનો વધારો, પરંતુ ઉત્સાહમાં ઘટાડો નહી, 40 કરોડ સુધીના વેપારની આશા
કોરોના અને મોંઘવારી વચ્ચે પણ આ વર્ષે પતંગબાજોનો ઉત્સાહ ઓછો થયો નથી. મકરસંક્રાંતિને આડે માત્ર ચાર દિવસ બાકી છે. આવી સ્થિતિમાં રવિવારે અને સોમવાર પતંગ બજારમાં પતંગ અને માંજાની ખરીદી માટે લોકોની ભારે ભીડ જોવા મળી હતી. બપોરથી સાંજ સુધી બજારમાં પગ મુકવાની પણ જગ્યા ન હતી. લોકોએ મકરસંક્રાંતિની 25 ટકા ખરીદી કરી હતી.
પતંગ અને માંજાના વ્યવસાય સાથે સંકળાયેલા લોકોનું કહેવું છે કે રવિવારે એક જ દિવસમાં લગભગ 8 થી 10 કરોડનો બિઝનેસ થયો હતો. સુરત સહિત દક્ષિણ ગુજરાતમાં 40 કરોડના ટર્નઓવરના બિઝનેસ આશા પતંગ વ્યવસાયીઓ સેવી રહ્યા છે. કોરોનાની ત્રીજી લહેરના ભય છતાં રવિવારે પતંગ બજારમાં લોકોની ભારે ભીડ જોવા મળી હતી.
મકરસંક્રાંતિ પહેલા રવિવાર હોવાથી શાળા બંધ હોવાથી અને રજા હોવાના કારણે આજે લોકોએ ખરીદી પણ કરી હતી. શહેરના મુખ્ય પતંગ બજારો ગણાતા ડબગરવાડ અને રાંદેરમાં સવારથી સાંજ સુધી પતંગની દુકાનો, દોરી રબરની દુકાનો, કાચા દોરાની દુકાનો પર ભીડ જામી હતી. માંઝો ઘસનારની દુકાનો પર એટલી ભીડ હતી કે તેમને બે દિવસ પછી આપવાના વાયદા આપવા પડ્યા હતા. પતંગ ઉપરાંત દોરા, ફેવિટીક્સ, ટેપ સ્ટ્રીપ્સ, ગમ, સીટી અને માસ્ક વગેરેની પણ મોટા પાયે ખરીદી કરવામાં આવી હતી.
સુરતમાં સામાન્ય રીતે મકરસંક્રાંતિના 15 દિવસ પહેલાથી પતંગ-માંઝા વગેરેની ખરીદી કરવામાં આવે છે. આ વખતે કોરોનાને કારણે શરૂઆતના દિવસોમાં ધંધો સુસ્ત રહ્યો હતો, પરંતુ છેલ્લા બે દિવસથી ધંધો સારો ચાલી રહ્યો છે. પતંગ વેચનાર મહેશભાઇએ કહ્યું કે અમને ડર હતો કે આ વખતે કોરોનાને કારણે આખો સ્ટોક વેચાઈ ન જાય. બે દિવસ પહેલા પણ આવી જ સ્થિતિ હતી, પરંતુ આજે જે રીતે કારોબાર થયો છે તે જોતા સમગ્ર સ્ટોક વેચાય તેવી ધારણા છે. સુરતના લોકો 14 જાન્યુઆરી સુધી એટલે કે મકરસંક્રાંતિના દિવસે ખરીદી કરે છે.
આ વખતે વાંસ, કાગળ અને અન્ય ચીજવસ્તુઓની કિંમતની સાથે વેતનમાં વધારાને કારણે પતંગના ભાવમાં 30 ટકા સુધીનો ઉછાળો આવ્યો છે. અન્ય ધંધામાં સામેલ થવાને કારણે પતંગ બનાવનારાઓના વેતનમાં પણ 60 ટકાનો વધારો થયો છે. જે મજૂરો પહેલા રોજના 300 રૂપિયામાં કામ કરતા હતા તેઓ હવે રોજના 600 રૂપિયાની માંગ કરી રહ્યા છે. આ સિવાય મોટી સંખ્યામાં કામદારોએ હવે ઓટો રિક્ષા ચલાવવાનું શરૂ કર્યું છે. જેના કારણે આ વખતે પતંગોનું ઉત્પાદન પણ ઓછું થયું હતું.
