ભાવનગર નકલી દારૂકાંડ: 8ના મોત, 61 અસરગ્રસ્ત; 14 આરોપીઓની ધરપકડ બાદ પોલીસ તપાસ તેજ

Bhavnagar Fake Liquor Case,

ભાવનગર નકલી દારૂકાંડમાં અત્યાર સુધીમાં કુલ 61 લોકો અસરગ્રસ્ત થયા હોવાનું કલેક્ટર દ્વારા સત્તાવાર રીતે જાહેર કરવામાં આવ્યું છે. આ પૈકી 43 ભોગ બનનારાઓએ સારવાર લીધી છે, જ્યારે 18 લોકોએ ઔપચારિક સારવાર લીધી હોવાનું જણાવાયું છે. સમગ્ર ઘટનાને પગલે આરોગ્ય તંત્ર દ્વારા અસરગ્રસ્ત લોકોની સારવાર અને તેમની સ્થિતિ પર સતત નજર રાખવામાં આવી રહી છે.

દર્દીઓની સ્થિતિ અને મૃત્યુઆંક 

હોસ્પિટલમાં દાખલ દર્દીઓમાંથી અત્યાર સુધીમાં 16 લોકોને ડિસ્ચાર્જ કરવામાં આવ્યા છે, જ્યારે હાલમાં 19 દર્દીઓ હોસ્પિટલમાં સારવાર હેઠળ છે. સારવાર લઈ રહેલા દર્દીઓમાંથી 5 દર્દીઓને ICUમાં રાખવામાં આવ્યા છે, જેમાં એક દર્દીની હાલત અત્યંત ક્રિટિકલ છે. આ ઘટનામાં અત્યાર સુધીમાં 8 લોકોના મોત થયા છે, જ્યારે 2 દર્દીઓના મોત શંકાસ્પદ માનવામાં આવી રહ્યા છે. રાહતની વાત એ છે કે છેલ્લા 24 કલાકમાં કોઈ નવો દર્દી હોસ્પિટલમાં દાખલ થયો નથી.

પોલીસ તપાસ અને આરોપીઓની ધરપકડ 

નકલી દારૂકાંડ અંગે પોલીસ તપાસ તેજ કરવામાં આવી છે અને અત્યાર સુધીમાં કુલ 14 આરોપીઓની ધરપકડ થઈ ચૂકી છે. શરૂઆતમાં ઝડપાયેલા 13 આરોપીઓને કોર્ટે 10 દિવસના રિમાન્ડ મંજૂર કર્યા હતા. આ કેસના મુખ્ય આરોપી રઈશના 9 દિવસના રિમાન્ડ મંજૂર કરવામાં આવ્યા છે. પોલીસ દ્વારા આરોપીઓની ભૂમિકા, નકલી દારૂનો સપ્લાય અને આખા નેટવર્ક અંગે ઘનશ્યામ તપાસ હાથ ધરવામાં આવી રહી છે.

રિમાન્ડ મુદત અને આગામી કાર્યવાહી

 આ કેસમાં ઝડપાયેલા તમામ આરોપીઓના રિમાન્ડ 31 ઓગસ્ટે પૂર્ણ થઈ રહ્યા છે. રિમાન્ડ પૂરા થયા બાદ તમામ આરોપીઓને ફરીથી કોર્ટ સમક્ષ રજૂ કરવામાં આવશે. પોલીસ તપાસ જેમ-જેમ આગળ વધી રહી છે, તેમ-તેમ નકલી દારૂકાંડ સાથે સંકળાયેલા અન્ય લોકો અને તેમના જોડાણો અંગે વધુ ચોંકાવનારી વિગતો સામે આવવાની શક્યતા સેવાઈ રહી છે.

રાજકીય ગરમાવો અને તંત્રની તકેદારી 

ભાવનગરની આ ગંભીર ઘટનાને પગલે રાજકીય સ્તરે પણ ભારે ચર્ચા જાગી છે, જેના ભાગરૂપે કોંગ્રેસ નેતા શક્તિસિંહ ગોહિલ ભાવનગરની મુલાકાત લેશે. તેઓ ત્યાં પહોંચીને સ્થિતિની માહિતી મેળવશે અને અસરગ્રસ્ત પરિવારોને મળશે. હાલમાં ભાવનગરમાં આ દારૂકાંડ બાદ આરોગ્ય તંત્ર, પોલીસ અને વહીવટી તંત્ર દ્વારા સમગ્ર પરિસ્થિતિ પર સતત કડક નજર રાખવામાં આવી રહી છે.