Publish Date: Mon, 07 Sep 2026 (09:35 IST)
Updated Date: Mon, 07 Sep 2026 (09:43 IST)
ઓલા, ઉબેર અને રેપિડો જેવી ઓનલાઈન ટેક્સી એપ્લિકેશનો સામે અમદાવાદના રિક્ષા અને ટેક્સી ચાલકોનું ‘રોજગાર બચાવો’ આંદોલન વધુ ઉગ્ર બન્યું છે. સરકાર સમક્ષ વારંવાર રજૂઆત કરવા છતાં પડતર પ્રશ્નોનું નિરાકરણ ન આવતાં અમદાવાદ રિક્ષા ચાલક એકતા સહિતના સંગઠનો દ્વારા આજથી 10 સપ્ટેમ્બર સુધી 4 દિવસના સંપૂર્ણ બંધનું એલાન આપવામાં આવ્યું છે.
આ દેશવ્યાપી વિરોધના પગલે શહેરમાં આશરે 3 લાખ રિક્ષા અને 70 હજારથી વધુ ટેક્સીઓના પૈડાં થંભી ગયા છે. વિરોધને કારણે સામાન્ય મુસાફરો, નોકરીયાતો અને વરિષ્ઠ નાગરિકોને આગામી દિવસોમાં ભારે હાલાકી ભોગવવી પડે એવી સ્થિતિ સર્જાઈ છે.
યુનિયનોનો આક્ષેપ છે કે ખાનગી એપ્લિકેશન કંપનીઓની અનિયંત્રિત નીતિઓને લીધે પરંપરાગત વાહન ચાલકોની રોજીરોટી પર ગંભીર સંકટ ઊભું થયું છે. ગેરકાયદેસર ટુ-વ્હીલર ટેક્સી સેવાઓ પર પ્રતિબંધ મૂકવો અને નિયત ધારાધોરણ મુજબ વાજબી ભાડાં નક્કી કરવાની તેમની મુખ્ય માંગણીઓ છે. ગત 27 ઓગસ્ટે ટ્રાન્સપોર્ટ કમિશનરને આવેદનપત્ર પાઠવ્યા બાદ 28 ઓગસ્ટથી પોસ્ટર્સ લગાવી વિરોધ દર્શાવાયો હતો, પરંતુ તંત્ર તરફથી પ્રતિસાદ ન મળતાં આખરે ચક્કાજામનો માર્ગ અપનાવવામાં આવ્યો છે.
આ બંધને સફળ બનાવવા માટે 3.70 લાખથી વધુ રિક્ષા અને ટેક્સી ચાલકો રસ્તા પરથી દૂર રહેશે, જ્યારે નિયમભંગ કરનારાઓને શાંતિપૂર્ણ રીતે સમજાવવા યુનિયનના કાર્યકરો તૈનાત રહેશે. જોકે, વિદ્યાર્થીઓના અભ્યાસને ધ્યાનમાં રાખીને માનવતાના ધોરણે સ્કૂલવાન અને સ્કૂલ રિક્ષા ચાલકોને આ બંધમાંથી મુક્તિ આપવામાં આવી છે, જેથી તેમની સેવાઓ ચાલુ રહેશે.
