અમદાવાદ: અમદાવાદ શહેરમાં SOG ક્રાઈમ બ્રાન્ચે નશાકારક કફ સીરપની ગેરકાયદેસર હેરાફેરી સામે મોટી કાર્યવાહી કરી છે. રિલીફ રોડ પર આવેલી GPO પોસ્ટ ઓફિસ નજીકથી પ્રતિબંધિત કફ સીરપનો મોટો જથ્થો ઝડપાયો છે. પોલીસની પ્રાથમિક તપાસમાં પોસ્ટલ સર્વિસનો ઉપયોગ કરીને કફ સીરપ દેશના અન્ય રાજ્યોમાં મોકલાતું હોવાની વિગતો સામે આવી છે.

5,050 બોટલનો જથ્થો જપ્ત

SOG ક્રાઈમ બ્રાન્ચે કાર્યવાહી દરમિયાન કફ સીરપની કુલ 5,050 બોટલો જપ્ત કરી છે. જપ્ત કરાયેલા જથ્થાની અંદાજિત બજાર કિંમત ₹60 લાખ હોવાનું સામે આવ્યું છે. આ કાર્યવાહી બાદ પોલીસે સમગ્ર નેટવર્કની તપાસ શરૂ કરી છે.

મિઝોરમ, ત્રિપુરા અને આસામમાં મોકલાતો હતો જથ્થો

પ્રાથમિક તપાસમાં પોલીસને જાણવા મળ્યું છે કે કફ સીરપનો આ જથ્થો કથિત રીતે પોસ્ટ દ્વારા મિઝોરમ, ત્રિપુરા અને આસામ જેવા પૂર્વોત્તર રાજ્યોમાં મોકલવામાં આવતો હતો. અમદાવાદમાં પોસ્ટલ સેવાનો ઉપયોગ કરીને મોટા પ્રમાણમાં નશાકારક સીરપની હેરાફેરીનું નેટવર્ક હોવાની માહિતી સામે આવતા તપાસ વધુ તેજ કરવામાં આવી છે.

મુખ્ય સૂત્રધારો સુધી પહોંચવા તપાસ

SOG ક્રાઈમ બ્રાન્ચે કફ સીરપનો જથ્થો કોણ મોકલતું હતું, કોને પહોંચાડવાનો હતો અને સમગ્ર નેટવર્કમાં અન્ય કેટલા લોકો સંડોવાયેલા છે તે અંગે તપાસ શરૂ કરી છે. પોલીસ દ્વારા જપ્ત કરાયેલા કફ સીરપના જથ્થા અને તેની હેરાફેરી સાથે સંકળાયેલા લોકોની પૂછપરછ કરવામાં આવી રહી છે.