બનાસકાંઠા બસ અને કાર વચ્ચે થયેલા ભયાનક અકસ્માતમાં એક દંપતી, તેમના બે પુત્રો સહિત 5 લોકોના મોત

ગુજરાતના બનાસકાંઠા જિલ્લામાં કાર (SUV) અને બસ વચ્ચે થયેલી ટક્કરમાં એક દંપતી અને તેમના બે પુત્રો સહિત પાંચ લોકોના મોત થયા છે જ્યારે નવ લોકો ઘાયલ થયા છે. પોલીસે આ માહિતી આપી. પોલીસે જણાવ્યું કે અકસ્માત સાંજે 4:30 વાગ્યાની આસપાસ અમીરગઢ શહેર નજીક થયો હતો.

પોલીસે જણાવ્યું હતું કે સ્પોર્ટ્સ યુટિલિટી વ્હીકલ (SUV) સાથે અથડાયેલી બસ રાજસ્થાન રાજ્ય માર્ગ પરિવહન નિગમની હતી. અમીરગઢ પોલીસ ઇન્સ્પેક્ટર એસ.કે. પરમારે જણાવ્યું હતું કે, “બસ રાજસ્થાનના સિરોહી તરફ જઈ રહી હતી ત્યારે અકસ્માત થયો હતો. પ્રારંભિક તપાસમાં જાણવા મળ્યું છે કે SUVનો ડ્રાઇવર હાઇવેની ખોટી બાજુએ બેદરકારીથી વાહન ચલાવી રહ્યો હતો અને અકસ્માતમાં ડ્રાઇવરનું પણ મૃત્યુ થયું હતું.

તેમણે કહ્યું કે આ અકસ્માતમાં SUV ડ્રાઈવર દિલીપ ખોખરિયા (32) ઉપરાંત અન્ય ચાર લોકોના પણ મોત થયા છે. પરમારે જણાવ્યું હતું કે અકસ્માતમાં બસમાં સવાર છ મુસાફરો સહિત નવ લોકો ઘાયલ થયા છે. અધિકારીએ જણાવ્યું કે મૃતકોની ઓળખ ખોખરિયાની પત્ની મેવલીબેન (28) અને તેમના બે પુત્રો રોહિત (6) અને ઋત્વિક (3) તરીકે થઈ છે.