Weather News - દેશના આ ભાગોમાં હીટ વેવનું રેડ એલર્ટ, ગુજરાત સહિત 10 રાજ્યોના લોકોને ગરમીથી મળશે રાહત

દેશના મોટાભાગના રાજ્યોના લોકોને આજે પણ આકરી ગરમીમાંથી રાહત મળવાની આશા નથી. હવામાન વિભાગે પશ્ચિમ બંગાળ અને ઓડિશામાં હીટ વેવનું રેડ એલર્ટ જાહેર કર્યું છે. આ સિવાય ઉત્તર પ્રદેશ, બિહાર, ઝારખંડ, તટીય આંધ્ર પ્રદેશ, યાનમ, રાયલસીમા, તેલંગાણા, તમિલનાડુ, પુડુચેરી, કરાઈકલ, કોંકણ, ગોવા, કેરળ, માહે અને આંતરિક કર્ણાટકમાં 30 એપ્રિલ સુધી ગરમીથી લૂ  રહેવાની શક્યતા છે.

મહારાષ્ટ્રમાં પણ આકરી ગરમી પડી રહી છે

હવામાન વિભાગે મહારાષ્ટ્રના થાણે, રાયગઢ જિલ્લાઓ અને મુંબઈના ભાગો માટે 27 થી 29 એપ્રિલ સુધી હીટવેવ એલર્ટ જાહેર કર્યું છે. 27 અને 28 એપ્રિલે તાપમાન તેની ટોચે પહોંચે તેવી શક્યતા છે. મહારાષ્ટ્રના જલગાંવમાં ગુરુવારે 42.7 ડિગ્રી સેલ્સિયસ નોંધાયું હતું. આ વિસ્તારનું સૌથી વધુ મહત્તમ તાપમાન હતું.

આ રાજ્યોના લોકોને મળશે ગરમીથી રાહત 

હવામાન વિભાગના મતે આગામી બે દિવસ ઉત્તર, મધ્ય અને દક્ષિણ ગુજરાતમાં કમોસમી વરસાદ પડી શકે છે...આજે બનાસકાંઠા, મહેસાણા, સાબરકાંઠા, અરવલ્લી, ખેડા, પંચમહાલ, દાહોદ, મહીસાગર, વડોદરા, છોટાઉદેપુર, નર્મદા, સુરત, ડાંગ, તાપી, નવસારી, વલસાડ, દમણ દાદરા નગર હવેલીમાં ગાજવીજ સાથે છૂટાછવાયો વરસાદ થવાની આગાહી છે.

હવામાન વિભાગના જણાવ્યા અનુસાર, 27 એપ્રિલે પંજાબ, હરિયાણા અને પૂર્વ મધ્ય પ્રદેશમાં છૂટાછવાયા સ્થળોએ ભારે પવન (40-50 કિમી પ્રતિ કલાક) સાથે કરા, વાવાઝોડા અને વીજળી પડવાની સંભાવના છે. આ રાજ્યોના લોકોને વરસાદ અને તેજ પવનના કારણે ગરમીથી રાહત મળી શકે છે. તે જ સમયે, 29 એપ્રિલ સુધી, અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરા રાજ્યોમાં ગાજવીજ સાથે છૂટોછવાયો વરસાદ પડશે. દરમિયાન, 28 એપ્રિલે સિક્કિમમાં હળવાથી મધ્યમ વરસાદ અને ગાજવીજ સાથે વરસાદની શક્યતા છે.