Publish Date: Thu, 06 Aug 2026 (11:45 IST)
Updated Date: Thu, 06 Aug 2026 (11:59 IST)
હરિયાણાના સોનીપતમાંથી સંબંધોની કડવી હકીકત સામે લાવતો એક હૃદયદ્રાવક કિસ્સો સામે આવ્યો છે. એક સમયે મહારાષ્ટ્રના જાણીતા કપડાના વેપારી રહેલા શિવચરણ ગુપ્તા (રતન)નું વૃદ્ધાશ્રમમાં સારવાર દરમિયાન અવસાન થયું. પરંતુ દુઃખની વાત એ રહી કે અંતિમ ક્ષણોમાં પોતાની દીકરીઓનો ચહેરો જોવાની આશા રાખનારા આ વૃદ્ધની અંતિમ વિદાય અને અસ્થિ વિસર્જનમાં પણ તેમની ત્રણેય દીકરીઓ હાજર રહી નહોતી.
માહિતી અનુસાર, મહારાષ્ટ્રના રહેવાસી શિવચરણ ગુપ્તા લગભગ દોઢ વર્ષ પહેલાં તેમની પત્ની મીના ગુપ્તા સાથે સોનીપતના એક વૃદ્ધાશ્રમમાં રહેવા આવ્યા હતા. તેમને કોઈ પુત્ર નહોતો. તેમણે પોતાની ત્રણેય દીકરીઓને સારી રીતે ભણાવી-ગણાવી આત્મનિર્ભર બનાવી હતી, જેમાંથી બે દીકરીઓ શિક્ષિકા છે. વૃદ્ધાશ્રમમાં રહેતા દરમિયાન જ તેમની પત્નીનું અવસાન થયું હતું, જેના બાદ શિવચરણ ગુપ્તા સંપૂર્ણપણે એકલા પડી ગયા હતા.
બીમારી દરમિયાન પણ દીકરીઓના ફોન આવવાનું બંધ થઈ ગયું
સોનીપત વૃદ્ધાશ્રમના સંચાલક આનંદના જણાવ્યા મુજબ, લગભગ 20 દિવસ પહેલાં શિવચરણ ગુપ્તાની તબિયત બગડતાં તેમની ત્રણેય દીકરીઓ અનિતા, નિશા અને પ્રિયાને જાણ કરવામાં આવી હતી.
મોટી દીકરી અનિતા નેપાળમાં શિક્ષિકા તરીકે કાર્યરત છે. બીજી દીકરી નિશા ઉત્તર પ્રદેશના આઝમગઢમાં રહે છે, જ્યારે સૌથી નાની દીકરી પ્રિયા મુંબઈમાં રહે છે. સંચાલકે જણાવ્યું કે પિતાની તબિયત ખરાબ થયા બાદ દીકરીઓના ફોન લગભગ બંધ થઈ ગયા હતા.
જ્યારે મોડી રાત્રે શિવચરણ ગુપ્તાનું અવસાન થયું ત્યારે વૃદ્ધાશ્રમ સંચાલકોએ દીકરીઓ અંતિમ દર્શન માટે આવી શકે તે માટે મૃતદેહને સુરક્ષિત રાખવાની પણ ઓફર કરી હતી. જોકે, ત્રણેય દીકરીઓએ સમયના અભાવે આવવાની અસમર્થતા દર્શાવી હતી.
ઓનલાઈન રૂપિયા મોકલ્યા, વીડિયો કોલથી જોયો અંતિમ સંસ્કાર
દીકરીઓ ન પહોંચતાં વૃદ્ધાશ્રમના સેવાદારો અને સ્થાનિક લોકોએ મળીને શિવચરણ ગુપ્તાનો અંતિમ સંસ્કાર કર્યો. મોટી દીકરી અનિતાએ ઓનલાઈન 5,100 મોકલી વૃદ્ધાશ્રમને પિતાના અંતિમ સંસ્કાર કરવાની વિનંતી કરી હતી.
ત્રણેય દીકરીઓએ વીડિયો કોલ દ્વારા પિતાના અંતિમ સંસ્કાર નિહાળ્યા અને સમગ્ર વિધિનો વીડિયો પણ મોકલવાની વિનંતી કરી હતી.
અસ્થિ વિસર્જનની જવાબદારી પણ વૃદ્ધાશ્રમને સોંપી
શરૂઆતમાં દીકરીઓએ અસ્થિઓ સાચવી રાખવા કહ્યું હતું, પરંતુ બાદમાં સમય ન હોવાનો હવાલો આપીને વૃદ્ધાશ્રમના સંચાલકને જ ગંગામાં અસ્થિ વિસર્જન કરવાની જવાબદારી સોંપી દીધી.
આ સમગ્ર ઘટનાએ દરેકની આંખો ભીની કરી દીધી છે. આખું જીવન પરિવાર માટે સમર્પિત કરનાર પિતાની આવી એકલવાયી વિદાયે સમાજમાં ઘટતા પારિવારિક મૂલ્યો અને સંબંધોની સંવેદનશીલતા અંગે ગંભીર પ્રશ્નો ઉભા કર્યા છે.
