કોલેજના વિદ્યાર્થીઓનું શરમજનક કૃત્ય! હોળીની ઉજવણીની પરવાનગી ન મળી તો પ્રિન્સિપાલ અને સ્ટાફને બંધ કરી દીધુ

મધ્યપ્રદેશના ઈન્દોરમાં એક ખૂબ જ શરમજનક કિસ્સો સામે આવ્યો છે. જ્યાં હોલકર સાયન્સ કોલેજમાં કેટલાક વિદ્યાર્થીઓએ પ્રિન્સિપાલ અને પ્રોફેસરોને તાળા મારી દીધા હતા. આરોપ છે કે કોલેજ સ્ટાફ અડધો કલાક યશવંત હોલમાં બંધ રહ્યો હતો. આ દરમિયાન વિદ્યાર્થીઓએ હોલનો વીજ પુરવઠો પણ બંધ કરી દીધો હતો. જણાવવામાં આવી રહ્યું છે કે હોળી પર કાર્યક્રમનું આયોજન કરવાની પરવાનગી ન મળવાને કારણે વિદ્યાર્થીઓ નારાજ હતા. કોલેજ મેનેજમેન્ટે આ મામલાની ફરિયાદ કલેક્ટરને કરી, ત્યારબાદ હોલકર કોલેજમાં બનેલી આ શરમજનક ઘટના સામે આવી.

તમને જણાવી દઈએ કે વિદ્યાર્થીઓએ કોલેજમાં હોળીનું આયોજન કરવાની પરવાનગી માંગી હતી, પરંતુ તેમને હોળી મનાવવાની મંજૂરી આપવામાં આવી ન હતી. પરવાનગી ન મળતા રોષે ભરાયેલા વિદ્યાર્થીઓએ તમામ પ્રોફેસરોને હોલમાં ફસાવી, કોલેજનો મુખ્ય ગેટ બંધ કરી દીધો, તેમાં લાકડા ફસાવ્યા અને કોઈને બહાર જવા દીધા નહીં.