DMart કર્મચારી માટે હિન્દીમાં વાત કરવી મોંઘી સાબિત થતાં MNS કાર્યકર્તાઓએ તેને થપ્પડ મારી

દેશની આર્થિક રાજધાની મુંબઈમાં સ્થિત ડીમાર્ટમાં એક કર્મચારીને હિન્દીમાં વાત કરવી મોંઘી પડી ગઈ છે. રાજ ઠાકરેની આગેવાની હેઠળની પાર્ટી મહારાષ્ટ્ર નવનિર્માણ સેના (MNS)ના કાર્યકરોએ કર્મચારીને મરાઠીમાં ન બોલવા બદલ થપ્પડ મારી હતી.

પોલીસે જણાવ્યું કે આ ઘટના મંગળવારે વર્સોવા, અંધેરી (વેસ્ટ)માં ડી-માર્ટ સ્ટોરમાં બની હતી. સોશિયલ મીડિયા પર વાયરલ થયેલા એક વીડિયોમાં સ્ટોરનો કર્મચારી એક ગ્રાહકને કહેતો સાંભળી શકાય છે કે હું મરાઠીમાં નહીં બોલીશ, હું માત્ર હિન્દીમાં જ બોલીશ. તમે જે ઈચ્છો તે કરો.

જ્યારે MNSને કર્મચારીની ટિપ્પણી વિશે જાણ થઈ, ત્યારે પાર્ટીના વર્સોવા એકમના પ્રમુખ સંદેશ દેસાઈની આગેવાની હેઠળના કાર્યકરોનું એક જૂથ સ્ટોર પર પહોંચ્યું અને કથિત રીતે કર્મચારીને થપ્પડ માર્યો.

આ ઘટનાનો એક વીડિયો પણ સોશિયલ મીડિયા પર સામે આવ્યો છે. અધિકારીઓએ જણાવ્યું હતું કે સ્ટોર કર્મચારીએ પાછળથી તેના વર્તન માટે માફી માંગી હતી.