Commonwealth Games 2026 ના ચોથા દિવસે સ્નેચ રાઉન્ડમાં ઋષિકાંત સિંહે બનાવ્યો રેકોર્ડ, મીરાબાઈ ચાનુ પાસેથી મેડલની અપેક્ષા

ગ્લાસગોમાં ચાલી રહેલી કોમનવેલ્થ ગેમ્સનો ચોથો દિવસ શરૂ થઈ ગયો છે અને આજનો દિવસ ભારતીય ચાહકો માટે ખૂબ જ ખાસ બની શકે છે. આજે ભારત પાસે પાંચ ગોલ્ડ મેડલ જીતવાની શાનદાર તક છે, કારણ કે ભારતીય ખેલાડીઓ ઘણી ફાઈનલ મેચોમાં પોતાનો દાવો રજૂ કરશે.

ચોથા દિવસે, ભારતીય ખેલાડીઓ વેઈટલિફ્ટિંગ, જિમ્નેસ્ટિક્સ, સ્વિમિંગ અને બોક્સિંગ જેવી રમતોમાં શાનદાર પ્રદર્શન કરે તેવી અપેક્ષા છે. આજના દિવસની શરૂઆત લૉન બાઉલ્સ મેચથી થઈ હતી, જ્યાં ભારતની રૂપા રાની અને પિંકી સિંહની જોડીએ મહિલા જોડીઓની ઈવેન્ટમાં નામીબિયા સામે મેદાન માર્યું હતું. આ પછી, ભારતની આગામી મેચ લૉન બાઉલ્સમાં જ ઇંગ્લેન્ડની ટીમ સામે થશે.

ભારતના ઋષિકાંત સિંહે કોમનવેલ્થ ગેમ્સ 2026માં પુરુષોની 60 કિગ્રા વેઈટલિફ્ટિંગ કેટેગરીમાં શાનદાર પ્રદર્શન કર્યું હતું. તેણે સ્નેચ રાઉન્ડની શરૂઆત 116 કિગ્રાની લિફ્ટ સાથે કરી હતી, અને પછી તેના બીજા પ્રયાસમાં સરળતાથી 119 કિગ્રા વજન ઉપાડ્યું હતું.

આ પછી, તેના ત્રીજા પ્રયાસમાં તેણે 121 કિલો વજન ઉપાડીને નવો કોમનવેલ્થ ગેમ્સ રેકોર્ડ બનાવ્યો અને સ્નેચ રાઉન્ડમાં લીડ મેળવી. આ શાનદાર શરૂઆત સાથે તે હવે ક્લીન એન્ડ જર્ક રાઉન્ડમાં પ્રવેશ કરશે, જ્યાંથી તેની મેડલ જીતવાની આશા ઘણી પ્રબળ બની ગઈ છે.