પશ્ચિમ બંગાળના હાવડા જિલ્લાના ઉલુબેરિયા શહેરમાંથી એક હૃદયદ્રાવક ઘટના સામે આવી છે. અહીં કચરાના ઢગલામાંથી 17 ભ્રૂણ મળી આવ્યા છે. ઉલુબેરિયાના બાનીબાલા ખારા વિસ્તારમાં વોર્ડ નંબર 31માંથી મળી આવેલા આ ભ્રૂણમાંથી 10 છોકરીઓના અને 7 છોકરાઓના છે. તમામ ભ્રૂણને પોસ્ટમોર્ટમ માટે હોસ્પિટલમાં મોકલવામાં આવ્યા છે.
ઉલુબેરિયા મ્યુનિસિપાલિટી અનુસાર, આ વિસ્તારના 1.5 કિમીની ત્રિજ્યામાં લગભગ 30 ખાનગી નર્સિંગ હોમ છે. પોલીસને શંકા છે કે ગર્ભપાત બાદ આ ભ્રૂણને કચરા તરીકે ફેંકી દેવામાં આવ્યા છે. પોલીસ તેની તપાસ કરી રહી છે.
કર્ણાટકમાં પણ 7 ભ્રૂણના અવશેષો મળી આવ્યા હતા
લગભગ બે મહિના પહેલા કર્ણાટકમાં આવી જ એક ઘટના સામે આવી હતી. 25 જૂને અહીંના બેલગાવીમાં એક નાળામાંથી 7 ભ્રૂણના અવશેષો મળી આવ્યા હતા. તમામ ભ્રૂણ માત્ર 5 મહિનાના હતા. આ ઘટના બેલગાવીના મુદલાગી શહેરમાં બસ સ્ટેન્ડ પાસે બની હતી. પોલીસને આશંકા હતી કે બસ સ્ટેન્ડની આસપાસની હોસ્પિટલોએ ગર્ભપાત બાદ આ ભ્રૂણોને ફેંકી દીધા હશે. આ મામલે પોલીસ તપાસ ચાલુ છે.
