ગુજરાત સહિત 16 રાજ્યો-UTની ડ્રાફ્ટ મતદાર યાદી જાહેર, 11 ડિસેમ્બર સુધી નોંધાવી શકાશે દાવા-વાંધા

ચૂંટણી પંચ દ્વારા નવી ડ્રાફ્ટ મતદાર યાદી પ્રસિદ્ધ કરવાની કામગીરી શરૂ કરી દેવામાં આવી છે, તેથી દરેક નાગરિકે યાદીમાં પોતાનું નામ તપાસી લેવું અનિવાર્ય છે. જો આ યાદીમાં તમારા નામ, સરનામા કે અન્ય કોઈ પણ માહિતીમાં ક્ષતિ રહી ગઈ હોય, તો તેને સુધારવાની તક પૂરી પાડવામાં આવી છે. નાગરિકો 12 નવેમ્બરથી 11 ડિસેમ્બર 2026 દરમિયાન પોતાના દાવા અને વાંધા રજૂ કરી શકશે, જેની પ્રક્રિયા પૂર્ણ થયા બાદ 4 જાન્યુઆરી 2027ના રોજ અંતિમ મતદાર યાદી બહાર પાડવામાં આવશે.

દેશભરમાં મતદાર યાદી સુધારણાનો પ્રારંભ, યુપીમાં તારીખ લંબાઈ 

દેશમાં મતદાર યાદી અપડેટ કરવાની કામગીરી હેઠળ ગુજરાત, રાજસ્થાન, મધ્યપ્રદેશ, બિહાર, કેરળ, પંજાબ, પશ્ચિમ બંગાળ, આસામ, છત્તીસગઢ, ગોવા, મણિપુર, તમિલનાડુ અને ઉત્તરાખંડ સહિત 13 રાજ્યો તથા અંદમાન-નિકોબાર, લક્ષદ્વીપ અને પુડુચેરી એમ 3 કેન્દ્રશાસિત પ્રદેશોની ડ્રાફ્ટ યાદી જાહેર થઈ છે. જોકે, ઉત્તર પ્રદેશમાં ડ્રાફ્ટ યાદી જાહેર કરવાની તારીખ પાંચ દિવસ લંબાવવામાં આવી હોવાથી હવે ત્યાં 17 નવેમ્બર 2026ના રોજ યાદી બહાર પડશે.

નામ ઉમેરવા અને સુધારા-વધારા માટેનો કાર્યક્રમ

ડ્રાફ્ટ મતદાર યાદી જાહેર થયા બાદ તેમાં નવું નામ ઉમેરવા, નામ કઢાવવા અથવા વિગતોમાં સુધારો કરાવવા માટે 12 નવેમ્બરથી 11 ડિસેમ્બર 2026 સુધીનો સમય આપવામાં આવ્યો છે. જો કોઈ મતદારનું નામ યાદીમાં રહી ગયું હોય, ખોટી વિગતો નોંધાઈ હોય કે કોઈ નામ સામે વાંધો હોય તો અરજી કરી શકાશે. મળેલી તમામ અરજીઓનો નિકાલ 28 ડિસેમ્બર 2026 સુધીમાં કરાશે અને 4 જાન્યુઆરી 2027ના રોજ આખરી યાદી જાહેર થશે. 

આસામની મતદાર યાદીમાં 2.18 લાખથી વધુનો ઉમેરો

આસામની નવી ડ્રાફ્ટ મતદાર યાદીમાં કુલ 2,51,76,910 મતદારોનાં નામ નોંધાયાં છે, જેમાં 1,25,87,650 પુરુષ, 1,25,88,939 મહિલા અને 321 ટ્રાન્સજેન્ડર મતદારો સામેલ છે. આ વર્ષે 10 ફેબ્રુઆરીએ જાહેર થયેલી આખરી યાદીના 2,49,58,139 મતદારોની સરખામણીમાં 2,18,771 મતદારોનો વધારો થયો છે. આ સુધારણા દરમિયાન 4,12,344 નવા નામ ઉમેરાયાં છે અને 1,93,573 નામ દૂર કરવામાં આવ્યાં છે. 

મણિપુરની તમામ 60 બેઠકો પર મહિલા મતદારોનો દબદબો

મણિપુરની ડ્રાફ્ટ મતદાર યાદીમાં કુલ 19,94,357 મતદારો નોંધાયા છે, જેમાં 9,69,298 પુરુષ, 10,24,735 મહિલા અને 324 ટ્રાન્સજેન્ડર મતદારોનો સમાવેશ થાય છે. રાજ્યના તમામ 16 જિલ્લાની 60 વિધાનસભા બેઠકો પર મહિલા મતદારોની સંખ્યા પુરુષો કરતાં વધારે છે. સપ્ટેમ્બરમાં જાહેર થયેલી આખરી યાદીના 19.60 લાખ મતદારોની સરખામણીએ નવી ડ્રાફ્ટ યાદીમાં આશરે 33,700 મતદારો વધ્યા છે. 

કેરળ અને બિહારની યાદીમાં નવા મતદારોનો ઉછાળો

કેરળ અને બિહારમાં અગાઉની ખાસ સઘન સુધારણા (SIR) બાદની આખરી યાદીની સરખામણીમાં મતદારોની સંખ્યામાં નોંધપાત્ર વધારો થયો છે. કેરળમાં અગાઉના 2,69,53,644 મતદારો સામે આશરે 4.06 લાખના વધારા સાથે હવે 2,73,60,254 મતદારો નોંધાયા છે. બીજી તરફ બિહારમાં અગાઉના 7.42 કરોડ મતદારોની સામે આશરે 13 લાખનો વધારો થતાં નવી ડ્રાફ્ટ યાદીમાં કુલ 7.55 કરોડ મતદારો થયા છે. 

તમિલનાડુમાં અગાઉની સરખામણીએ મતદારો ઘટ્યા

અનેક રાજ્યોમાં મતદારો વધ્યા છે ત્યારે તમિલનાડુની નવી SSR ડ્રાફ્ટ મતદાર યાદીમાં આશરે 5.77 કરોડ મતદારો નોંધાયા છે. રાજ્યમાં SIR પહેલાં આશરે 6.41 કરોડ મતદારો હતા, જે સુધારણા પ્રક્રિયા બાદ ઘટીને 5.67 કરોડ થયા હતા. હાલની નવી ડ્રાફ્ટ યાદીમાં થોડો વધારો જરૂર થયો છે, પરંતુ SIR પહેલાંની સંખ્યાની સરખામણીમાં હજુ પણ મતદારોની સંખ્યા ઓછી જોવા મળી રહી છે.

રાજસ્થાનની નવી યાદીમાં 5.26 કરોડથી વધુ નામો સામેલ

રાજસ્થાનની નવી ડ્રાફ્ટ મતદાર યાદીમાં કુલ 5,26,67,416 મતદારોનાં નામ નોંધાયાં છે. હવે રાજ્યના નાગરિકોને યાદીમાં પોતાના નામ અને અન્ય વિગતો ચકાસવાની તક મળશે. જો યાદીમાં નામ ન હોય તો નવું નામ ઉમેરાવવા, નામ દૂર કરાવવા અથવા નોંધાયેલી વિગતોમાં કોઈ ભૂલ હોય તો તેમાં સુધારો કરાવવા માટે નિયત સમયમાં દાવા અને વાંધા નોંધાવી શકાશે. 

ચૂંટણી પૂર્વે પંજાબમાં નવા યુવા મતદારો માટે તક

આગામી વર્ષની શરૂઆતમાં વિધાનસભા ચૂંટણી યોજાવાની શક્યતા હોવાથી પંજાબની તમામ 117 વિધાનસભા બેઠકો માટે જાહેર થયેલી ડ્રાફ્ટ મતદાર યાદી વિશેષ મહત્વ ધરાવે છે. 4 જાન્યુઆરી 2027ના રોજ જાહેર થનારી આખરી યાદી માટે 1 જાન્યુઆરી 2027ને લાયકાતની તારીખ નક્કી કરવામાં આવી છે. જેથી 1 જાન્યુઆરી 2027 સુધીમાં 18 વર્ષ પૂરાં કરનારા યુવાનો નવા મતદાર તરીકે નામ નોંધાવવા અરજી કરી શકશે. 

ગુજરાતના નાગરિકો માટે વિગતો ચકાસવાની અપીલ 

ગુજરાતમાં પણ નવી ડ્રાફ્ટ મતદાર યાદી જાહેર થઈ ચૂકી હોવાથી રાજ્યના મતદારોએ યાદીમાં પોતાનું નામ અને અન્ય વિગતો અવશ્ય ચકાસી લેવી જોઈએ. ખાસ કરીને નામની જોડણી, સરનામું કે અન્ય વિગતોમાં ભૂલ હોય તો સુધારા માટે તેમજ નામ ન હોય તો ઉમેરાવવા માટે 11 ડિસેમ્બર 2026 સુધીમાં અરજી કરી શકાશે. તમામ અરજીઓના નિકાલ બાદ 4 જાન્યુઆરી 2027ના રોજ આખરી મતદાર યાદી બહાર પાડવામાં આવશે