ગુજરાતમાં ચોમાસું વિધિવત સક્રિય: 24 કલાકમાં 259 તાલુકામાં મેઘમહેર, અંજારમાં સૌથી વધુ 7.24 ઈંચ વરસાદ

rain in gujarat

ગુજરાતમાં ચોમાસાની સિસ્ટમ ફરી સક્રિય થતાં સમગ્ર રાજ્યમાં વરસાદી માહોલ જામ્યો છે. છેલ્લા 24 કલાકમાં રાજ્યના કુલ 259 તાલુકાઓમાં હળવાથી ભારે વરસાદ નોંધાયો છે. આ વરસાદથી વાતાવરણમાં ગુલાબી ઠંડક પ્રસરી ગઈ છે અને ખેડૂતોમાં પણ ભારે આનંદ જોવા મળી રહ્યો છે. હવામાન વિભાગના જણાવ્યા અનુસાર, આવનારા દિવસોમાં પણ રાજ્યના અનેક ભાગોમાં વરસાદી સિસ્ટમ કાર્યરત રહેશે.

કચ્છ અને સૌરાષ્ટ્રમાં મેઘરાજાની તોફાની બેટિંગ

છેલ્લા 24 કલાકના આંકડા મુજબ કચ્છના અંજાર તાલુકામાં સૌથી વધુ 7.24 ઈંચ વરસાદ ખાબક્યો છે. આ ઉપરાંત વલ્લભીપુરમાં 6.10 ઈંચ, જામનગરમાં 5.59 ઈંચ, બોરસદમાં 5.51 ઈંચ અને ઉનામાં 5.43 ઈંચ જેટલો ભારે વરસાદ નોંધાયો છે. આ વિસ્તારોમાં ધોધમાર વરસાદને કારણે નીચાણવાળા ભાગોમાં પાણી ભરાવાની સ્થિતિ સર્જાઈ છે.

મધ્ય અને ઉત્તર ગુજરાતમાં પણ વરસાદી ધમાકો

સૌરાષ્ટ્ર-કચ્છ ઉપરાંત મધ્ય અને ઉત્તર ગુજરાતના તાલુકાઓમાં પણ સાર્વત્રિક વરસાદ થયો છે. જેમાં કોટડાસાંગાણીમાં 5.20 ઈંચ, ગાંધીધામમાં 4.61 ઈંચ, ભચાઉમાં 4.41 ઈંચ તેમજ કડી અને કરજણમાં 4.29-4.29 ઈંચ વરસાદ નોંધાયો છે. આ આંકડા દર્શાવે છે કે વરસાદી સિસ્ટમ સમગ્ર રાજ્યમાં એકસમાન રીતે સક્રિય થઈ છે.

સુરત, બોટાદ અને અન્ય વિસ્તારોમાં નોંધપાત્ર વરસાદ 

રાજ્યના અન્ય વિસ્તારોની વાત કરીએ તો સુરત, બોટાદ અને ધોળકામાં 4.13 થી 4.17 ઈંચ સુધીનો વરસાદ પડ્યો છે. જ્યારે નડિયાદ, જામકંડોરણા, ભરૂચ અને તાલાલામાં 4-4 ઈંચ વરસાદ નોંધાયો છે. હવામાન વિભાગે આગામી સમયમાં પણ ભારે વરસાદની આગાહી કરી હોવાથી સ્થાનિક તંત્રને એલર્ટ રહેવા અને નીચાણવાળા વિસ્તારોમાં સાવચેતી રાખવા સૂચના આપવામાં આવી છે