સરકારી નોકરીની ઉત્તમ તક: GSRTC માં 2510 હેલ્પરની ઓનલાઇન ભરતી શરૂ

GSRTC recruitment

GSRTC દ્વારા હેલ્પરની મોટી ભરતીની જાહેરાત ગુજરાત રાજ્ય માર્ગ વાહન વ્યવહાર નિગમ (GSRTC) દ્વારા સરકારી નોકરીની તૈયારી કરતા ઉમેદવારો માટે એક મહત્વપૂર્ણ અને મોટા સમાચાર સામે આવ્યા છે. નિગમ દ્વારા 'હેલ્પર'ની કુલ  2510  જગ્યાઓ માટે નવી ભરતીની જાહેરાત કરવામાં આવી છે. આ ભરતી માટે પાત્રતા ધરાવતા ઉમેદવારો આવનારી ૭ સપ્ટેમ્બરથી અધિકૃત 

વેબસાઇટ દ્વારા ઓનલાઇન અરજી કરી શકશે.

જગ્યાઓનું અનામત અને માસિક ફિક્સ પગાર આ ભરતી અંતર્ગત જાહેર કરાયેલી કુલ ૨૫૧૦ જગ્યાઓમાંથી નિયમ મુજબ ૫૦૨ જગ્યાઓ પૂર્વ સૈનિકો માટે અને ૫૨ જગ્યાઓ દિવ્યાંગ ઉમેદવારો માટે અનામત રાખવામાં આવી છે. ભરતી પ્રક્રિયામાં અંતિમ પસંદગી પામેલા ઉમેદવારોને શરૂઆતના ૫ વર્ષના સમયગાળા માટે માસિક ૨૧,૧૦૦ રૂપિયાનું ફિક્સ પગારધોરણ ચૂકવવામાં આવશે.

ઓનલાઇન અરજી પ્રક્રિયા અને પસંદગીના માપદંડ 

ભરતી માટેની સમગ્ર અરજી પ્રક્રિયા સંપૂર્ણપણે ઓનલાઇન રાખવામાં આવી છે. રસ ધરાવતા ઉમેદવારોએ રાજ્ય સરકારના અધિકૃત OJAS પોર્ટલ (ojas.gujarat.gov.in) પર જઈને જ પોતાની અરજી સબમિટ કરવાની રહેશે. ઉમેદવારોની પસંદગી સ્પર્ધાત્મક પરીક્ષાના આધારે કરવામાં આવશે, જેમાં શૈક્ષણિક લાયકાત અને એપ્રેન્ટિસશીપના અનુભવ ધરાવતા ઉમેદવારોને વિશેષ પ્રાધાન્ય આપવામાં આવશે.

OJAS પોર્ટલ પર અરજી કરવાની સ્ટેપ-બાય-સ્ટેપ રીત 

-અરજી કરવા માટે ઉમેદવારોએ OJAS વેબસાઇટ પર 'Apply Online' માં 'Helper' પોસ્ટ પસંદ કરી 'Apply Now' પર ક્લિક કરવાનું   રહેશે.

- ત્યાં પોતાની વ્યક્તિગત વિગતો, શૈક્ષણિક લાયકાત અને કમ્પ્યુટર જ્ઞાનની માહિતી ભરીને ફોર્મ સેવ કરવાનું રહેશે. 

- ત્યારબાદ જનરેટ થયેલા અરજી નંબરના આધારે નિયત સાઈઝ (ફોટો: 5cm x 3.6cm, સહી: 2.5cm x 7.5cm, મહત્તમ 10KB)માં ફોટો અને સહી અપલોડ કરવાના રહેશે. 

- વિગતો ચકાસીને અરજી કન્ફર્મ કર્યા બાદ મળેલા કન્ફર્મેશન નંબર દ્વારા ઓનલાઇન ફી ભરીને ફોર્મની પ્રિન્ટ કાઢી લેવાની રહેશે.