સરકારી કર્મચારીઓ માટે મોટા સમાચાર! નિવૃત્ત અને અવસાન પામેલા કર્મચારીઓના પરિવારોને વ્યાજ સાથે મળશે બચત ફંડની રકમ

good news for govt. employees

ગુજરાત સરકારના કર્મચારીઓ માટે એક ખૂબ જ રાહત અને લાભદાયી સમાચાર સામે આવ્યા છે. રાજ્ય સરકારના નાણા વિભાગ દ્વારા જૂથ વીમા યોજના-1981 (GIS) હેઠળ બચત ફંડ અને વીમા રકમની ચુકવણી અંગે એક નવો સત્તાવાર પરિપત્ર જાહેર કરવામાં આવ્યો છે. સરકારના આ મહત્વપૂર્ણ નિર્ણયને કારણે નિવૃત્ત થતા તેમજ સેવા દરમિયાન કમનસીબે અવસાન પામેલા કર્મચારીઓના પરિવારજનોને આર્થિક રીતે મોટો ટેકો અને વધારાનો નાણાકીય લાભ મળી રહેશે.

એપ્રિલથી જૂન 2026  વચ્ચે નિવૃત્ત કે અવસાન પામેલા કર્મચારીઓને મળશે લાભ

નાણા વિભાગ દ્વારા બહાર પાડવામાં આવેલા આ નવા પરિપત્રની વિગતો મુજબ, 1 એપ્રિલ, 2026 થી લઈને 30  જૂન, 2026 ના સમયગાળા દરમિયાન નિવૃત્ત થયેલા અથવા તો સેવા દરમિયાન અવસાન પામેલા રાજ્ય સરકારના તમામ કર્મચારીઓને આ યોજનાનો સીધો લાભ આપવામાં આવશે. આવા કર્મચારીઓને અથવા તેમના આશ્રિત પરિવારજનોને તેમના બચત ફંડ (Savings Fund) ની પૂરેપૂરી રકમ યોગ્ય વ્યાજ ઉમેરીને ચૂકવવામાં આવશે.

બચત ફંડ પર 7.1 ટકા વ્યાજદર નક્કી: વર્ગ અનુસાર જાહેર કરાયા અલગ દરો

રાજ્ય સરકાર દ્વારા આ યોજના હેઠળ જમા થયેલા બચત ફંડ પર 7.1 ટકાનો આકર્ષક વ્યાજદર નક્કી કરવામાં આવ્યો છે, જેના આધારે જ કર્મચારીઓને આખરી ચુકવણી કરવામાં આવશે. આ ઉપરાંત, નાણા વિભાગે કર્મચારીઓના વિવિધ જૂથો (ક્લાસ-1 થી ક્લાસ-4 ) ને ધ્યાનમાં રાખીને બચત ફંડની ચુકવણી માટે અલગ-અલગ દરો પણ જાહેર કર્યા છે, જેથી દરેક કર્મચારીને તેમના વર્ગ અને હોદ્દા અનુસાર વ્યાજ સહિતની રકમનો સચોટ અને યોગ્ય લાભ પ્રાપ્ત થઈ શકે.

કર્મચારીઓના પરિવારોને આર્થિક સુરક્ષા આપવાનો મુખ્ય હેતુ

આ નીતિગત નિર્ણયનો મુખ્ય હેતુ નિવૃત્ત થતા કર્મચારીઓ અને તેમના પરિવારોને નિવૃત્તિ પછીના જીવનમાં વધુ મજબૂત આર્થિક સુરક્ષા પ્રદાન કરવાનો છે. નિવૃત્તિ સમયે મળનારી આ રકમમાં વ્યાજનો સમાવેશ થતાં કર્મચારીઓને મોટી આર્થિક મદદ મળી રહેશે. રાજ્ય સરકારના તમામ વહીવટી વિભાગો, સરકારી કચેરીઓ અને સંસ્થાઓને આ પરિપત્રનો તાત્કાલિક અને ચુસ્ત અમલ કરવા માટે જરૂરી વહીવટી કાર્યવાહી કરવાની કડક સૂચનાઓ પણ આપી દેવામાં આવી છે.