ગુજરાતમાં મહિલાઓ સાથે અત્યાચારની ઘટનાઓ દિવસો દિવસ વધતી જઈ રહી છે. દુખની વાત એ છે કે આ અત્યાચાર એ જ લોકો કરે છે જેના પર અત્યાચારનો ભોગ બનેલી વ્યક્તિ કે તેનો પરિવાર વિશ્વાસ કરતા હોય. હવે આ એક મોટો પ્રશ્ન છે કે શુ હવે દિકરીઓને સગાઓ પર પણ વિશ્વાસ ન કરવાની શીખ આપવી શરૂ કરુ દેવી જોઈએ ? આવી જ એક ઘટના જસદણ તાલુકાના ભંડારિયા ગામમાં એક વાડીમાં રહી ખેતમજૂરી કરતા મૂળ મધ્યપ્રદેશના પરિવાર સાથે બની છે. પરિવારની સગીરાને તેના ફઈના દીકરાએ જ હવસનો શિકાર બનાવી દુષ્કર્મ ગુજાર્યું હતું. ગઈકાલે સગીરાને અચાનક પેટમાં દુખાવો ઊપડતાં સારવાર માટે રાજકોટની સિવિલ હોસ્પિટલમાં ખસેડવામાં આવી હતી.
આ દુષ્કર્મના બનાવમાં સગીરા સાથે તેના ફઈના દીકરાએ જ શરીરસંબંધ બાંધી લીધાનું સામે આવ્યું હતું. ગઇકાલે 15 વર્ષની એક સગીરાને પેટના દુખાવાની ફરિયાદ સાથે રાજકોટ સિવિલ હોસ્પિટલમાં ખસેડાઇ હતી. અહીં લાવવામાં આવતાં ઝનાના વિભાગમાં સારવાર દરમિયાન સગીરાના પેટમાં ત્રણ માસનો ગર્ભ હોવાનું જણાયું હતું. બાદમાં સગીરાની પૂછપરછમાં એવી વિગતો ખૂલી હતી કે તે હાલ જસદણના ભંડારિયા ગામની વાડીમાં માતા-પિતા સાથે રહે છે. ત્રણેક મહિના પહેલાં તેના ફઈ વતન મધ્યપ્રદેશ લઈ ગયાં હતાં.
હોળીના તહેવાર પર તે વતનમાં ગયા બાદ ફરી જસદણના ભંડારિયા ગામમાં પોતાના માતા-પિતા પાસે પરત ફરી હતી. પરંતુ ગઈકાલે અચાનક દુઃખાવો થતા પ્રથમ સરધાર બાદ વધુ સારવાર માટે રાજકોટ સિવિલ હોસ્પિટલ ખસેડવામાં આવી હતી. અહીં તેને ત્રણ માસનો ગર્ભ હોવાનું જણાયું હતું. સગીરાએ ભાડલા પોલીસને નિવેદન આપતા જણાવ્યું હતું કે, તેના ફઇના સગીર વયના દીકરાએ તેની સાથે બળજબરીપૂર્વક દુષ્કર્મ આચર્યું હતું. આથી ભાડલા પોલીસે જરૂરી કાગળો કરી જે વિસ્તારમાં બનાવ બન્યો તે વિસ્તારના પોલીસ મથકમાં જાણ કરી કાયદેસરની કાર્યવાહી હાથ ધરી છે.
