અમરેલીમાં 80મા રાજ્યકક્ષાના સ્વતંત્રતા પર્વની ભવ્ય ઉજવણી, મુખ્યમંત્રીએ કર્યું ધ્વજવંદન

અમરેલીમાં 80મા રાજ્ય કક્ષાના સ્વતંત્રતા દિવસની ભવ્ય ઉજવણી કરવામાં આવી હતી, જેમાં મુખ્યમંત્રી પટેલે ધ્વજવંદન કર્યું હતું. અમરેલીમાં ૮૦મા સ્વતંત્રતા દિવસની રાજ્ય કક્ષાની ઉજવણી ઉત્સાહ અને દેશભક્તિના વાતાવરણ વચ્ચે યોજાઈ હતી. મુખ્યમંત્રીએ પોલીસ પરેડ ગ્રાઉન્ડ ખાતે ત્રિરંગો ફરકાવ્યો હતો. ઘોડા શો, ડોગ શો, બુલેટ શો અને સાંસ્કૃતિક કાર્યક્રમો મુખ્ય હતા. અમરેલી માટે ₹૪૦૩ કરોડના વિકાસ પ્રોજેક્ટ્સની પણ જાહેરાત કરવામાં આવી હતી.

અમરેલી જિલ્લામાં 80મા સ્વતંત્રતા પર્વની રાજ્યકક્ષાની ઉજવણી દેશભક્તિ અને ઉત્સાહભર્યા માહોલ વચ્ચે કરવામાં આવી રહી છે. સ્વતંત્રતા પર્વની ભવ્ય ઉજવણીને લઈને અમરેલીવાસીઓમાં ભારે ઉત્સાહ અને થનગનાટ જોવા મળી રહ્યો છે. શહેરના પોલીસ પરેડ ગ્રાઉન્ડ ખાતે યોજાયેલા રાજ્યકક્ષાના કાર્યક્રમમાં મુખ્યમંત્રી ભૂપેન્દ્ર પટેલના હસ્તે રાષ્ટ્રધ્વજ ફરકાવવામાં આવ્યો હતો.

ધ્વજવંદન બાદ પોલીસ પરેડ ગ્રાઉન્ડ ખાતે ભવ્ય અને આકર્ષક પરેડનું આયોજન કરવામાં આવ્યું હતું. પોલીસ જવાનોની શિસ્તબદ્ધ પરેડે ઉપસ્થિત લોકોમાં દેશભક્તિનો જુસ્સો જગાવ્યો હતો. કાર્યક્રમ દરમિયાન પોલીસ જવાનો દ્વારા અશ્વ શો, ડોગ શો તેમજ સાહસિક બુલેટ શો રજૂ કરવામાં આવ્યા હતા, જે ઉપસ્થિત લોકો માટે ખાસ આકર્ષણનું કેન્દ્ર બન્યા હતા.

સ્વતંત્રતા પર્વની ઉજવણી દરમિયાન વિવિધ સાંસ્કૃતિક અને રંગારંગ કાર્યક્રમો પણ યોજાયા હતા. દેશભક્તિની ભાવનાથી ભરપૂર આ કાર્યક્રમોએ ઉપસ્થિત નાગરિકોના મન મોહી લીધા હતા. સમગ્ર કાર્યક્રમ દરમિયાન રાષ્ટ્રપ્રેમ અને દેશ માટે ગૌરવની લાગણી જોવા મળી હતી.

આ ઐતિહાસિક અવસર પર પર્યાવરણ જાગૃતિનો સંદેશ પણ આપવામાં આવ્યો હતો. પર્યાવરણ સંરક્ષણને પ્રોત્સાહન આપવા વૃક્ષારોપણ કાર્યક્રમનું આયોજન કરવામાં આવ્યું હતું. રાજ્યકક્ષાની આ ભવ્ય ઉજવણીમાં ભાગ લેવા માટે મોટી સંખ્યામાં અમરેલીવાસીઓ પોલીસ પરેડ ગ્રાઉન્ડ ખાતે ઉમટી પડ્યા હતા.

સમગ્ર પરેડ ગ્રાઉન્ડ દેશભક્તિના રંગે રંગાઈ ગયું હતું અને ‘ભારત માતા કી જય’ના નારાઓથી વાતાવરણ ગુંજી ઉઠ્યું હતું. અમરેલીમાં યોજાયેલી આ રાજ્યકક્ષાની ઉજવણી સ્વતંત્રતા પર્વના ગૌરવ, રાષ્ટ્રપ્રેમ અને એકતાની ભાવનાને વધુ પ્રબળ બનાવતી બની છે.