તેલંગાણાના કોમરમ ભીમ આસિફાબાદ જિલ્લામાં સોમવારે સાંજે ભૂકંપ આવ્યો હતો. રાષ્ટ્રીય ભૂકંપ વિજ્ઞાન કેન્દ્ર અનુસાર, ભૂકંપની તીવ્રતા રિક્ટર સ્કેલ પર 3.8 માપવામાં આવી હતી. ભૂકંપના આંચકા સાંજે ૬:૫૦ વાગ્યે અનુભવાયા હતા, જોકે સત્તાવાર સૂત્રોએ જાનમાલના નુકસાનના કોઈપણ અહેવાલોને નકારી કાઢ્યા છે.
દરમિયાન, કરીમનગર શહેરના ઘણા વિસ્તારોમાં પણ, સાંજે 6:47 વાગ્યે લોકોએ થોડી સેકન્ડ માટે હળવા ભૂકંપના આંચકા અનુભવ્યા. કેટલાક રહેવાસીઓએ દાવો કર્યો હતો કે ધરતી જોરદાર અવાજ સાથે ધ્રુજી ઉઠી હતી અને તે સમયે શહેરમાં ભારે પવન સાથે વરસાદ પણ પડી રહ્યો હતો. જોકે, કરીમનગરના એક અધિકારીએ આ અંગે કોઈ સત્તાવાર માહિતી હોવાનો ઇનકાર કર્યો હતો. મીડિયા અહેવાલોમાં એમ પણ કહેવામાં આવ્યું છે કે રાજ્યના નિર્મલ અને મંચેરિયલ જિલ્લાના કેટલાક ભાગોમાં પણ હળવા ભૂકંપના આંચકા અનુભવાયા હતા.
નેશનલ સેન્ટર ફોર સિસ્મોલોજી અનુસાર, ભૂકંપનું કેન્દ્ર પૃથ્વીની સપાટીથી 10 કિલોમીટરની ઊંડાઈએ હતું. હાલમાં આ ભૂકંપને કારણે કોઈ નુકસાન કે ઈજાના સમાચાર નથી.
