શાળાઓમાં ડિજિટલ પેમેન્ટ ફરજિયાત, UPI અને RuPayથી થશે ફી સહિતની ચૂકવણી

દેશભરમાં કેશલેસ વ્યવહારોને પ્રોત્સાહન આપવા માટે સેન્ટ્રલ બોર્ડ ઓફ સેકન્ડરી એજ્યુકેશન (CBSE) દ્વારા શાળાઓ માટે મહત્વપૂર્ણ સૂચનાઓ જાહેર કરવામાં આવી છે. કેન્દ્ર સરકારના નાણા મંત્રાલયના નાણાકીય સેવા વિભાગ (DFS)ની સૂચનાઓના આધારે CBSEએ તમામ સંલગ્ન સરકારી અને ખાનગી શાળાઓને કેમ્પસમાં શૈક્ષણિક તેમજ બિન-શૈક્ષણિક સેવાઓ માટે ડિજિટલ પેમેન્ટની સુવિધા શરૂ કરવા જણાવ્યું છે.

ફીથી લઈને કેન્ટીન સુધી ડિજિટલ પેમેન્ટ

શાળાઓમાં વિવિધ નાણાકીય વ્યવહારો માટે UPI, RuPay સહિતની ડિજિટલ ચુકવણી સુવિધાઓ ઉપલબ્ધ કરાવવામાં આવશે. તેમાં મુખ્યત્વે નીચેની સેવાઓનો સમાવેશ થાય છે:

ટ્યુશન અને એડમિશન ફી: વાલીઓ UPI, BBPS અને નેટ બેંકિંગ દ્વારા ફી ભરી શકશે.

કેન્ટીન: વિદ્યાર્થીઓ અને સ્ટાફ QR કોડ અથવા કાર્ડ દ્વારા રોકડ વગર ચૂકવણી કરી શકશે.

લાઇબ્રેરી અને સ્ટેશનરી: પુસ્તકો, સ્ટેશનરી ખરીદી તેમજ લાઇબ્રેરીના દંડની ચુકવણી ડિજિટલ માધ્યમથી કરી શકાશે.

સ્પોર્ટ્સ અને અન્ય ફી: રમતગમતની ફી, શૈક્ષણિક પ્રવાસ, પિકનિક અને ટ્રાન્સપોર્ટેશન ચાર્જ પણ કેશલેસ રીતે ચૂકવી શકાશે.

નબળા નેટવર્કવાળા વિસ્તારોમાં પણ ડિજિટલ પેમેન્ટની સુવિધા

જે વિસ્તારોમાં ઇન્ટરનેટ કનેક્ટિવિટી નબળી હોય અથવા વારંવાર નેટવર્કની સમસ્યા રહેતી હોય તેવી શાળાઓ માટે પણ વિકલ્પ આપવામાં આવ્યો છે. આવી શાળાઓ UPI Lite, UPI LiteX અને ફીચર ફોન માટેની UPI 123PAY જેવી સુવિધાઓનો ઉપયોગ કરી શકશે.

આ ઉપરાંત શાળાઓને પોતાના ERP સિસ્ટમ સાથે ફી કલેક્શન અને શિક્ષકો તથા અન્ય સ્ટાફના પગારની ડિજિટલ પ્રક્રિયાને જોડવા માટે પણ પ્રોત્સાહિત કરવામાં આવી છે.

વિદ્યાર્થીઓ અને વાલીઓને ડિજિટલ વ્યવહારો અંગે જાગૃત કરાશે

CBSEની સૂચનાઓમાં માત્ર ડિજિટલ પેમેન્ટની સુવિધા ઊભી કરવા પર ભાર મૂકાયો નથી. વિદ્યાર્થીઓ, શિક્ષકો અને વાલીઓને સુરક્ષિત ડિજિટલ વ્યવહારો અંગે જાગૃત કરવા માટે સાયબર સુરક્ષા અને નાણાકીય સાક્ષરતા કાર્યક્રમો યોજવાની પણ સલાહ આપવામાં આવી છે.

પેરેન્ટ-ટીચર મીટિંગ (PTM) દરમિયાન વાલીઓને કેશલેસ પદ્ધતિથી ફી ભરવા અંગે માહિતી આપવામાં આવશે અને તેમને ડિજિટલ પેમેન્ટ માટે પ્રોત્સાહિત કરવામાં આવશે.

ડિજિટલ પેમેન્ટ વ્યવસ્થાથી શાળાઓમાં નાણાકીય વ્યવહારો વધુ પારદર્શક બનવાની સાથે વાલીઓ માટે ફી અને અન્ય ચાર્જ ચૂકવવાની પ્રક્રિયા પણ વધુ ઝડપી અને સરળ બનશે.