GT એ લગાવી જીતની હેટ્રિક, KKR ને મળી સતત 5 મી હાર, પ્લેઓફની આશાઓ પર પાણી ફરી વળ્યું

GT vs KKR: IPL 2026 ની 25મી મેચમાં કોલકાતા નાઈટ રાઈડર્સ અને ગુજરાત ટાઇટન્સ આમને-સામને હતા. અમદાવાદના નરેન્દ્ર મોદી સ્ટેડિયમ ખાતે પ્રથમ બેટિંગ કરતા, કોલકાતા નાઈટ રાઈડર્સ 20 ઓવરમાં 180 રનમાં ઓલઆઉટ થઈ ગઈ. કેમેરોન ગ્રીને સૌથી વધુ 79 રન બનાવ્યા. ગુજરાત તરફથી કાગીસો રબાડાએ ત્રણ વિકેટ લીધી. મોહમ્મદ સિરાજ અને અશોક શર્માએ બે-બે વિકેટ લીધી.

કોલકાતાના સ્કોરના જવાબમાં, ગુજરાત ટાઇટન્સે શાનદાર પ્રદર્શન કર્યું, 181 રનનો લક્ષ્યાંક છેલ્લી ઓવરમાં 5 વિકેટ ગુમાવીને હાંસલ કર્યો. કેપ્ટન શુભમન ગિલ ગુજરાતની જીતનો હીરો રહ્યો, તેણે 50 બોલમાં 8 ચોગ્ગા અને 4 છગ્ગાની મદદથી 86 રન બનાવ્યા. જોસ બટલરે 25 રનનું યોગદાન આપ્યું. આમ, ગુજરાતે સતત ત્રીજી મેચ જીતી અને પોઈન્ટ ટેબલમાં મોટો ઉછાળો નોંધાવ્યો.

કોલકાતા નાઈટ રાઈડર્સ માટે આ સિઝન અત્યંત નિરાશાજનક રહી છે. અજિંક્ય રહાણેની કેપ્ટનશીપ હેઠળ, ટીમ હજુ સુધી જીતી શકી નથી. તેઓ 6 માંથી 5 મેચ હારી ગયા છે, જ્યારે પંજાબ સામેની મેચ વરસાદને કારણે રદ કરવામાં આવી ત્યારે તેમને માત્ર એક જ પોઈન્ટ મળ્યો હતો. કેકેઆર હાલમાં પોઈન્ટ ટેબલમાં સૌથી નીચે છે, અને આ હારથી તેમની પ્લેઓફની આશાઓને મોટો ફટકો પડ્યો છે.