શા માટે ખાસ છે G7 મંચ? રશિયા-યુક્રેન અને મધ્ય-પૂર્વના તણાવ વચ્ચે સંતુલન જાળવવામાં ભારતની ભૂમિકા મહત્ત્વની

G7 summit

ફ્રાન્સના એવિયન-લેસ-બેન્સમાં G7 સમિટ ચાલી રહી છે. આ સમિટમાં ભાગ લેવા માટે વડા પ્રધાન નરેન્દ્ર મોદી પહોંચ્યા છે. આ દરમિયાન અમેરિકી રાષ્ટ્રપતિ ડોનાલ્ડ ટ્રમ્પ અને પીએમ મોદીની ઔપચારિક મુલાકાત પણ થઈ હતી. આગામી થોડા દિવસો સુધી સમગ્ર વિશ્વનું ધ્યાન આ G7 સમિટ પર રહેશે. ઈરાની પ્રતિનિધિઓ પણ આ બેઠકમાં હાજરી આપશે. એવું માનવામાં આવે છે કે G7 સમિટમાં મધ્ય પૂર્વના સંઘર્ષનો કાયમી ઉકેલ પણ મળશે.

G7 સમિટ ભારત માટે કેમ ખાસ છે?

ભારત G7નું ઔપચારિક સભ્ય નથી, છતાં સતત આઠમી વખત ભારતને આ સમિટમાં હાજરી આપવા માટે આમંત્રણ આપવામાં આવ્યું છે. આ બેઠક ભારત માટે વ્યૂહાત્મક, આર્થિક અને વૈશ્વિક રાજદ્વારીની દ્રષ્ટિએ અત્યંત મહત્વપૂર્ણ છે. હાલમાં, વિશ્વ રશિયા-યુક્રેન અને ઈરાન-અમેરિકા વચ્ચેના તણાવ અને સંઘર્ષોથી ઝઝૂમી રહ્યું છે, જેમાં ભારતે હંમેશા સંવાદ અને રાજદ્વારી અભિગમ અપનાવ્યો છે. રશિયા અને પશ્ચિમી દેશો બંને સાથે ભારતના સંબંધો સારા હોવાથી, તે બંને પક્ષો વચ્ચે સંતુલન જાળવવામાં મહત્વની ભૂમિકા ભજવી શકે છે.

આ બેઠક સમગ્ર વિશ્વ માટે મહત્વપૂર્ણ છે. આ બેઠક એવા સમયે થઈ રહી છે જ્યારે મધ્ય પૂર્વમાં અમેરિકા અને ઈરાન વચ્ચે એક કરાર થયો છે. શિખર સંમેલન પછી, જીનીવામાં મધ્ય પૂર્વ યુદ્ધનો અંત જાહેર થઈ શકે છે. ઈરાન અને અમેરિકા બંનેના પ્રતિનિધિઓ હાજર રહેશે.

અનેક દેશોના નેતાઓ પહોંચ્યા 

G7 સમિટ ફ્રેન્ચ રિસોર્ટ ટાઉન એવિયન-લેસ-બેન્સમાં યોજાઈ રહી છે. વિશ્વના મુખ્ય વિકસિત અર્થતંત્રો અને આમંત્રિત ભાગીદાર દેશોના નેતાઓ વૈશ્વિક આર્થિક, રાજકીય અને પર્યાવરણીય પડકારો પર ચર્ચા કરે છે. ત્રણ દિવસીય સમિટમાં યુએસ પ્રમુખ ડોનાલ્ડ ટ્રમ્પ સૌપ્રથમ પહોંચ્યા હતા. તેમના પછી જર્મન ચાન્સેલર ફ્રેડરિક મેર્ટ્ઝ, ઇટાલીના વડા પ્રધાન જ્યોર્જિયા મેલોની, બ્રિટિશ વડા પ્રધાન કીર સ્ટારમર, કેનેડિયન વડા પ્રધાન માર્ક કાર્ની અને જાપાનના વડા પ્રધાન સના તાકાચી સહિત અન્ય વિશ્વ નેતાઓ આવ્યા હતા. ચર્ચામાં યુએસ-ઈરાન શાંતિ કરાર તેમજ વૈશ્વિક સુરક્ષા અને અર્થતંત્રને લગતા મુખ્ય મુદ્દાઓને આવરી લેવાની અપેક્ષા છે.

પીએમ મોદી તેમના વર્તમાન યુરોપિયન પ્રવાસના છેલ્લા તબક્કામાં ફ્રાન્સ પહોંચ્યા. આ પહેલા, તેમણે સ્લોવાકિયાની બે દિવસીય મુલાકાત પૂર્ણ કરી. પીએમ મોદીએ તેમની મુલાકાતને દ્વિપક્ષીય સંબંધોને મજબૂત બનાવતી ગણાવી.