વર્લ્ડ હેલ્થ ઑર્ગેનાઇઝેશનનું કહેવું છે કે, “ચીનમાં કોવિડ-19ની નવી લહેર વચ્ચે હૉસ્પિટલ દર્દીઓથી ઊભરાઈ રહી છે.”
ડબ્લ્યૂએચઓના ઇમરજન્સી ચીફ ડૉક્ટર માઇકલ રેયાને કહ્યું છે કે, “ભલે અધિકારી દર્દીઓની સંખ્યા ઓછી બતાવી રહ્યા છે, પરંતુ ઇન્ટેસિવ કેર યુનિટ્સ (આઈસીયુ) ભરેલાં છે.”
ચીનનાં આંકડા દર્શાવે છે કે, બુધવારે કોવિડના કારણે કોઈનું મૃત્યુ થયું નથી, પરંતુ મહામારીના વાસ્તવિક પ્રભાવને લઈને શંકા છે.
ચીનમાં કોરોના મહામારી વધવાની સાથે તાજેતરના દિવસોમાં રાજધાની બીજિંગ અને અન્ય શહેરોની હૉસ્પિટલમાં દર્દીઓની સંખ્યા વધી રહી છે.
વર્ષ 2020થી ચીને કહેવાતી ઝીરો કોવિડ નીતિ હેઠળ વિવિધ આરોગ્ય નિયંત્રણો લાદ્યા છે.
જોકે, અર્થવ્યવસ્થા પર આ નીતિની આડઅસર જોતા સરકારે બે અઠવાડિયા પહેલાં કેટલાક નિયમોમાં છૂટછાટ પણ આપી હતી.
ત્યારથી કોરોનાની સંખ્યામાં વધારો થયો છે. સાથે જ વૃદ્ધોમાં મોતના કેસ વધવાનો ડર પણ ઊભો થઈ ગયો છે.
