કોલકાતાની આરજી કર મેડિકલ કોલેજ અને હોસ્પિટલમાં તૈનાત કેન્દ્રીય ઔદ્યોગિક સુરક્ષા દળ (CISF)ના એક જવાનની લગ્નનું વચન આપી એક મહિલા સાથે વારંવાર દુષ્કર્મ કરવાના આરોપસર ધરપકડ કરવામાં આવી છે. પોલીસના એક વરિષ્ઠ અધિકારીએ બુધવારે આ માહિતી આપી હતી.
મહિલા દ્વારા નોંધાવવામાં આવેલી લેખિત ફરિયાદના આધારે નારાયણપુર પોલીસે 9 જૂને આરોપી પારુલ અહમદની ધરપકડ કરી હતી. ત્યારબાદ તેને કોર્ટમાં રજૂ કરવામાં આવ્યો હતો, જ્યાંથી તેને પોલીસ કસ્ટડીમાં મોકલવામાં આવ્યો હતો.
તપાસકર્તાઓના જણાવ્યા મુજબ, મહિલાની માતાની સારવાર આ હોસ્પિટલમાં ચાલી રહી હતી. હોસ્પિટલમાં વારંવાર આવવા-જવાના કારણે મહિલાનો પરિચય અહમદ સાથે થયો હતો. બાદમાં આ ઓળખાણ સંબંધમાં બદલાઈ ગઈ હતી.
પોલીસના જણાવ્યા અનુસાર, ફરિયાદી મહિલાનો આરોપ છે કે અહમદ તેને ચિનાર પાર્ક વિસ્તારની એક હોટેલમાં લઈ ગયો હતો, જ્યાં તેણે તેની સાથે કથિત રીતે દુષ્કર્મ કર્યું હતું અને તેની મંજૂરી વગર આપત્તિજનક વીડિયો પણ બનાવ્યા હતા.
મહિલાનો વધુમાં આરોપ છે કે આરોપીએ આ વીડિયોનો ઉપયોગ કરીને તેને ડરાવી-ધમકાવી હતી અને બે અલગ-અલગ પ્રસંગે તેનું યૌન શોષણ કર્યું હતું.
પોલીસના એક વરિષ્ઠ અધિકારીએ જણાવ્યું હતું કે ફરિયાદના આધારે કેસ નોંધવામાં આવ્યો છે અને આરોપીની ધરપકડ કરવામાં આવી છે. તેમણે વધુમાં જણાવ્યું કે પીડિતાની સારવાર હાલમાં પણ ચાલુ છે.
