રાજકોટમાં કાળઝાળ માતાનો કરતૂત: પ્રેમસંબંધ માટે 2 વર્ષની માસૂમ દીકરીને પાંચમા માળેથી ફેંકી દીધી

રાજકોટના કુવાડવા રોડ પર આવેલી સોસાયટીમાં 2  વર્ષ અને 4 મહિનાની માસૂમ બાળકીના શંકાસ્પદ મોત પાછળ કોઈ અજાણ્યો નહીં, પરંતુ તેની પોતાની જનેતા જ જવાબદાર હોવાનું પોલીસ તપાસમાં બહાર આવ્યું છે. પતિ સાથેના ઝઘડાને કારણે આ પરિણીતા પોતાની બાળકી સાથે માવતરે રહેતી હતી. પ્રેમસંબંધ અને બાળકી પ્રત્યેની અણગમાને કારણે તેણે જ પોતાની પુત્રીને મોતને ઘાટ ઉતારી હોવાની ચોંકાવનારી વિગતો સામે આવી છે.

કુટિલ માતાનું ડ્રામેબાજી અને પોલીસને ગુમરાહ કરવાનો પ્રયાસ

ઘટના બાદ આરોપી માતાએ ભારે નાટક કરી પોલીસ અને મીડિયાને પણ ગેરમાર્ગે દોરવાનો પ્રયાસ કર્યો હતો. તેણે નિવેદન આપ્યું હતું કે તે બાથરૂમમાં હતી ત્યારે બાળકી ગુમ થઈ ગઈ હતી અને બાદમાં તે પાંચમા માળે તપાસ કરવા ગઈ ત્યારે પુત્રી નીચે પડી હોવાની ખબર પડી હતી. એટલું જ નહીં, આ બનાવ અંગે વાત કરતી વખતે મહિલાએ બે-ત્રણ વખત બેભાન થવાનું નાટક પણ કર્યું હતું જેથી કોઈને તેના પર શંકા ન જાય.

ચાર ફૂટ ઊંચી દીવાલ બન્યા રહસ્ય પરથી પડદો ઉઠાવવાનું કારણ

ગત ૧૨ ઓક્ટોબરના રોજ સાંજે બનેલી આ દુર્ઘટનામાં બાળકી જ્યાંથી નીચે પટકાઈ હતી ત્યાં આશરે 4 ફૂટ ઊંચી દીવાલ હતી. નાની બાળકી જાતે આટલી ઊંચી દીવાલ પર ચડી શકે તેમ ન હોવાથી પરિવારજનો અને મામાએ કોઈએ તેને જાણી જોઈને ફેંકી હોવાની દ્રઢ શંકા વ્યક્ત કરી હતી. આ શંકાના આધારે બી-ડિવિઝન પોલીસ સ્ટેશનનો સ્ટાફ તાત્કાલિક ઘટનાસ્થળે દોડી ગયો હતો અને ઊંડાણપૂર્વક તપાસ શરૂ કરી હતી.

પોલીસની કડક પૂછપરછમાં માતાએ પોપડો ખોલ્યો

પીઆઈ જી.આર. ચૌહાણ અને તેમની ટીમે પડોશીઓ, પરિવારજનો સહિત આશરે 15  લોકોની સઘન પૂછપરછ હાથ ધરી હતી. શરૂઆતમાં સીસીટીવી કેમેરા કામ ન કરતા હોવાથી મુશ્કેલી ઊભી થઈ હતી અને માતા પણ વાર્તાઓ બનાવી રહી હતી. પરંતુ પોલીસની આકરી અને મક્કમ પૂછપરછ સામે આખરે માતા ભાંગી પડી હતી અને તેણે જ પોતાની પુત્રીને પાંચમા માળેથી ફેંકી દીધી હોવાની કબૂલાત આપી હતી.

કાયદેસરની કાર્યવાહી અને પિતાને ફરિયાદી બનાવવાની તજવીજ

આઘાતજનક ખુલાસા બાદ પોલીસે બાળકીના મૃતદેહનું સિવિલ હોસ્પિટલમાં ફોરેન્સિક પોસ્ટમોર્ટમ કરાવ્યું હતું. પંચનામા અને પુરાવા એકત્ર કરવાની સાથે પોલીસે આ ગુનામાં આગળની કાનૂની કાર્યવાહી તેજ કરી છે. હાલમાં બાળકીના પિતાને આ કેસમાં સત્તાવાર રીતે ફરિયાદી બનાવવા માટેની વિશેષ તજવીજ પોલીસ દ્વારા હાથ ધરવામાં આવી રહી છે.