બેંગલુરુ નજીકના નેલમંગલા વિસ્તારમાંથી હૃદયદ્રાવક ઘટના સામે આવી છે. અહીં 31 વર્ષીય એક મહિલાએ પતિ સાથે ફોન પર થયેલા વિવાદ બાદ કથિત રીતે ઝેર પી પોતાનું જીવન ટૂંકાવી લીધું. મૃતકની ઓળખ ગૌરીબિદાનુરના બીરમ્મનહલ્લી ગામની રહેવાસી તનુજા તરીકે થઈ છે.
તનુજા અને યેલહંકાના માયાચંદ્રા વિસ્તારમાં રહેતા રવિન્દ્રની પ્રેમકથા રોજિંદા સફર દરમિયાન શરૂ થઈ હતી. બંને કામ પર જતાં-આવતાં મળતા હતા. શરૂઆતમાં સામાન્ય વાતચીતથી શરૂ થયેલો પરિચય ધીમે-ધીમે ગાઢ મિત્રતામાં અને પછી પ્રેમમાં બદલાયો. બંનેએ જીવનભર સાથે રહેવાનો નિર્ણય લીધો અને પ્રખ્યાત ધાર્મિક સ્થળ ધર્મસ્થળમાં જઈ પ્રેમલગ્ન કર્યા.
લગ્ન બાદ રવિન્દ્રે તનુજાને જણાવ્યું કે તેનો પરિવાર આંતરજાતીય અને અચાનક થયેલા આ લગ્નને સહેલાઈથી સ્વીકારશે નહીં. પરિવારને મનાવવા માટે સમય માગતાં તેણે તનુજાને યેલહંકામાં ભાડાનું એક રૂમ અપાવ્યું, જ્યારે પોતે માતા-પિતાના ઘરે રહેવા લાગ્યો.
યેલહંકાના તે ભાડાના રૂમમાં એકલી રહેતી તનુજા ધીમે-ધીમે ડિપ્રેશનનો શિકાર બનવા લાગી. એક દિવસ તેણે રવિન્દ્રને ફોન કરીને તરત મળવા બોલાવ્યો. જોકે રવિન્દ્રે પરિવાર વચ્ચે હોવાની મજબૂરી દર્શાવી તાત્કાલિક આવી શકતો નથી તેમ કહી બીજા દિવસે સવારે આવવાનું વચન આપ્યું.
આ જવાબથી દુઃખી અને પોતાને સંપૂર્ણ એકલી અનુભવી રહેલી તનુજાએ ગુસ્સામાં પોતાનો મોબાઇલ ફોન બંધ કરી દીધો. ત્યારબાદ રવિન્દ્રને તનુજાનો છેલ્લો મેસેજ મળ્યો, જેમાં લખ્યું હતું કે, "મેં ઝેર પી લીધું છે અને હાલમાં હું નેલમંગલાના બસવનહલ્લીમાં છું."
મેસેજ મળતા જ ગભરાયેલા રવિન્દ્ર તરત જ ઘટનાસ્થળે પહોંચ્યા અને તનુજાને નેલમંગલાની સરકારી હોસ્પિટલમાં દાખલ કરી. પરંતુ સારવાર દરમિયાન ડોક્ટરોએ તેને મૃત જાહેર કરી.
પ્રાથમિક તપાસમાં મનોચિકિત્સકો અને પોલીસનું માનવું છે કે લગ્ન પછી પણ સમાજ અને પરિવાર તરફથી સ્વીકાર ન મળવાને કારણે તનુજા અસુરક્ષા અને એકલતાનો સામનો કરી રહી હતી. પતિ તરત મળવા ન આવી શક્યો તેને તેણે અંતિમ અસ્વીકાર તરીકે લીધો અને ભાવનાત્મક આઘાતમાં આવી આ આત્મઘાતી પગલું ભર્યું હોવાનું અનુમાન છે.
હાલ પોલીસે કેસ નોંધ્યો છે અને સમગ્ર મામલે વધુ તપાસ શરૂ કરી છે.
